Со други зборови, тој побара од Обвинителството во конкретниот предмет да ги преиспита своите наводи и да ја запре постапката за дел од обвинетите кои се товарат за тешки дела против општата сигурност. Во изјава за медиумите во врска со неговото барање, адвокатот Петре Шилегов кажа дека за иста крвичноправна квалификација за едни лица се запира постапката, додека за други таа продолжува
Адвокатот Петре Шилегов, кој е бранител на поранешниот советник во Министерството за економија, Шофкет Хазари, обвинет во предметот судскиот процес за „Пулс“, на почетокот на денешното рочиште се осврна на брифингот на ОЈО ГОКК од петокот во однос на запрената постапка за седум полициски службеници.
Имено, како што соопштија од Основното јавно обвинителство за гонење организиран криминал и корупција, овие полициски службеници биле надлежни да вршат проверки во делот на исполнување на условите за заштита на јавниот ред и мир и безбедноста во сообраќајот, но не и проверки поврзани со услови за противпожарна заштита и минимално-технички услови за вршење угостителска дејност кои не спаѓаат во нивна надлежност.
„Оттука, нивните дејствија не можат да се доведат во директна причинско-последична врска со настанувањето на пожарот критичната вечер“,
рекоа од ОЈО ГОКК во петокот.
Повикувајќи се на овој момент од одлуката на ОЈО ГОКК, Шилегов рече дека делата за кои е запрена постапката против седумтемина полициски службеници се поклопуваат со оние за кои се гонат дел од обвинетите за пожарот против кои во тек е судска постапка. Во таа насока, адвокатот рече дека Јавното обвинителство што го застапува обвинението треба да ги преиспита наводите во него. Според Шилегов, образложението на ОЈО ГОКК и наводите во обвинението за пожарот се контрадикторни. Шилегов.
„Го замолувам Јавното обвинителство да го преиспита своето мислење и став. Ако за полицајците не може да биде поведена постапка за загрозување на општата сигурност тогаш Обвинителството треба да каже за кои лица овде обвинетите може да им се стави на товар ова дело. Наместо да продолжиме мислам дека е поцелисходно Обвинителството да утврди за кои лица може да се води постапка. Еден ден судење државата ја чини 150 000 евра што укажува на неекономичност на судењето”,
рече Шилегов.
Со други зборови, тој побара од Обвинителството во конкретниот предмет да ги преиспита своите наводи и да ја запре постапката за дел од обвинетите кои се товарат за тешки дела против општата сигурност.
На неговиот предлог се приклучија и бранителите на другите обвинети.
Во изјава за медиумите во врска со неговото барање, Шилегов кажа дека за иста крвично-правна квалификација за едни лица се запира постапката, додека за други таа продолжува.
Судијката Диана Груевска-Илиевска, која претседава со петчлениот судечки совет, во врска со овој момент рече дека и Судот со голем интерес го следел брифитнгот ја побарал одлуката од ОЈО ГОКК за да се запознае со неа.
„Додека Судот не ја добие одлуката ние продолжуваме со постапката. Засега не можеме да знаеме дали наводите се поклопуваат со она што е дел од оваа постапка”,
кажа судијката.
Јавниот обвинител Борче Јованов рече дека до овој момент тие ги немаат обвиненијата на ОЈО ГОКК, но напомена дека во конкретната постапка не се опфатени полициски службеници.
„Напоменувам дека денес во оваа судница сме по одобрен и степен во сила обвинителен акт. Јавното обвинителство ги нема на увид овие одлуки на ОЈО ГОКК и нема увид дали таму се наведени оштетени лица, кои се тие оштетени лица и во што се состои нанесената или причинета штета”,
рече Обвинителот.
ОЈО ГОКК во петокот поднесе три обвиненија против полициски службеници поврзани со настаните во т.н. кабаре „Пулс“ во Кочани кои се случија на 16 март, а кога загинаа 63 лица, а околу 200 беа повредени. Станува збор за одделна постапка од судскиот процес што е во тек. Во трите обвиненија се опфатени вкупно 25 полициски службеници од кои дел се началници во кочанска и штипската полиција. Дел се гонат за тешки дела против општата сигурност, а дел за злоупотреба на службената положба и овластување.
„Истовремено, донесена е и наредба за запирање на истражната постапка за седум полициски службеници, на кои им се ставаат на товар дејствија што ги презеле во временскиот период од 2012 до 2022 година. Со оглед на тоа што надлежноста на Специјализираното одделение на ОЈО ГОКК е од 2018 година, Обвинителството ќе ги цени само дејствијата преземи од 2019 до 2022, додека за другите предметот е испратен на надлежно постапување во ОЈО Кочани“,
кажаа од Обвинителството за гонење на организиран криминал и корупција.