Оценувајќи ја изјавата на премиерот за длабоко загрижувачка, оттаму велат дека таа е сериозна закана за основните човекови права и принципите на еднаквост и слобода. Се додава дека ваквата потенцијална мерка не само што би била ретроградна, туку и дискриминаторска бидејќи, пред сè, ги крши човековите права – на избор, на приватен и семеен живот, правото на планирање семејство, животен стил, семејна состојба и иднина
Мрежата за заштита од дискриминација остро ја осуди денешната изјава на премиерот Христијан Мицкоски, кој говорејќи од настанот „Демографски трендови, предизвици и можни решенија“, рече дека Владата сериозно размислува да воведе дополнителни даноци за немажените и неженетите граѓани.
Оценувајќи ја изјавата на премиерот за длабоко загрижувачка, оттаму велат дека таа е сериозна закана за основните човекови права и принципите на еднаквост и слобода. Се додава дека ваквата потенцијална мерка не само што би била ретроградна, туку и дискриминаторска бидејќи, пред сè, ги крши човековите права – на избор, на приватен и семеен живот, правото на планирање семејство, животен стил, семејна состојба и иднина.
„Мерката го стигматизира секој кој не живее во брачна заедница – било од избор, било од околности. Ги удира младите, самохраните родители, ЛГБТИ+ лицата и оние кои се социјално и економски ранливи, не придонесува кон развој на општеството, туку отвора врата за нови поделби, стигма и нееднаквост“,
велат од Мрежата за заштита од дискриминација.
Потсетуваат дека членот 25 од Уставот на секој граѓанин му гарантира почитување и заштита на приватноста на личниот, семејниот живот, достоинството, угледот, како и дека со Уставот е регулирана и заштитена вонбрачната заедница.
„Ваквиот предлог јасно кореспондира со идеите кои доаѓаат од авторитарни режими, кои преку ретроградни наративи имаат за цел насилно зголемување на наталитетот. Наместо казнување на личните избори преку даночен систем, потребни се политики кои ги поддржуваат младите семејства, достапни градинки, сигурно вработување, родова еднаквост и слободен избор на партнерство и родителство“,
додаваат од Мрежата.
Оттаму ја повикаа Владата да се воздржи од иницијативи кои поттикнуваат дискриминација, а институциите да застанат во одбрана на правата на сите граѓани без разлика на нивниот брачен статус, додавајќи дека животниот стил не е основа за оданочување, а бракот треба да биде избор, а не даночна обврска.
Премиерот Христијан Мицкоски денеска објави дека Владата сериозно размислува да воведе дополнителни даноци за немажените и неженетите граѓани во државата. Тој ова го кажа говорејќи на дебатата „Демографски трендови, предизвици и можни решенија“, која денеска се одржа во свечената сала во Владата.
На најавата за евентуално воведување дополнителни даноци за оваа категорија граѓани, во говорот на Мицкоски претходеа пораки за демографските предизвици во земјава и намалениот наталитет од година в година.