Бугарскиот премиер Бојко Борисов денеска изрази надеж дека следната година ќе се најде заедничко решение за продолжување на процесот на интеграција на Република Северна Македонија во Европската Унија.
Борисов ова го кажа на седницата на бугарската влада на која беше донесена одлука од секоја количина вакцини против ковид-19, која стигнува во таа држава, една одредена количина да биде наменета за нашите граѓани и тоа да биде во форма на донација. На седницата, на покана на Борисов и бугарскиот министер за здравство Костадин Ангелов, присуствуваше и министерот за здравство Венко Филипче.
„Ова го правиме со чисто срце и без никакви заткулисни намери, го правиме за нашите најблиски соседи. Се надевам дека следната година со Захарева и Каракачанов ќе пронајдеме заедничко решение за интегрирањето на Северна Македонија во Европската Унија, како што ја поддржавме и за НАТО. Така што не се случи ништо страшно, прашање на политичка волја и од двете страни е да стигнеме дотаму“,
изјави бугарскиот премиер Бојко Борисов на денешната седница на бугарската влада.
Борисов за оваа одлука информираше и на својот фејсбук-профил, каде што напиша дека Бугарија е подготвена да помогне со вакцини против ковид-19 во регионот на Западен Балкан.
Тој на Фејсбук напиша дека на седницата присуствувал и министерот Филипче, кој, како што посочи Борисов, ја изразил благодарноста на Северна Македонија за поддршката во овие тешки времиња.