Вучиќ денеска изјави дека заминува на средба во Брисел, но дека нема да разговара со Курти, туку само со Борел
Високиот претставник на Европската Унија (ЕУ), Жозеп Борел, соопшти дека ги повикал српскиот претседател Александар Вучиќ и косовскиот премиер Албин Курти на итна средба во Брисел со цел да се најде излез од актуелната криза, јави Мина.
Борел на Твитер напиша дека е потребна итна деескалација и нови избори на северот на Косово, со учество на припадниците на српската заедница.
„Ова е најважното нешто за регионот и ЕУ“,
напиша Борел.
Вучиќ денеска изјави дека заминува на средба во Брисел, но дека нема да разговара со Курти, туку само со Борел.
Курти претходно потврди дека денеска ќе отпатува за Брисел на средбата свикана од високиот претставник на ЕУ по зголемените тензии на северот на Косово.
За тензиите на северот на Косово ќе се разговара и на состанокот на министрите за надворешни работи на земјите членки на Европската Унија што ќе се одржи на 26 јуни во Луксембург.
Ситуацијата на северот на Косово ескалира на 29 мај, кога Србите се судрија со припадниците на КФОР во Звечан, една од четирите општини со мнозинско српско население на северот. Во инцидентот имаше околу 80 повредени од двете страни.
Повредени 25 припадници на КФОР во судирот со српските демонстранти во Звечан
Потоа, на 14 јуни, Приштина и Белград излегоа со спротивставени информации во врска со апсењето на тројцата косовски полицајци.
Додека Косово тврди дека тие биле „киднапирани“ од територијата на општина Лепосавиќ во близина на границата, Србија наведува дека тие всушност биле уапсени на нејзина територија.
КФОР соопшти дека врз основа на достапните податоци, не е јасно каде точно биле припадниците на косовската полиција во моментот на апсењето.