Жртвите биле префрлени на лекување во болниците во блискиот град Мастунг. Министерот за внатрешни работи Сарфраз Бугти ја нарече експлозијата „многу грозоморен чин“
Најмалку 52 лица загинаа, а повеќе од 50 се повредени во експлозија на бомба на верски собир во пакистанската југозападна провинција Белучистан, соопшти полицијата додавајќи дека најверојатно станува збор за самоубиствен напад. Југозападната провинција Белучистан во минатото беше место на напади од исламистички и сепаратистички милитанти.
Експлозијата се случила во близина на џамија за време на верска поворка одржана по повод роденденот на пророкот Мухамед, изјави владин претставник, пренесува АП.
„Се чини дека станува збор за самоубиствен напад. Бомбаш самоубиец активира експлозив во близина на возилото на заменик-началникот на полицијата“,
рече висок офицер на локалната полиција Џавед Лехри.
Муслиманите во Пакистан и ширум светот го слават роденденот на исламскиот пророк со одржување јавни состаноци, јавува АП.
Ниту една група сè уште не ја презела одговорноста за нападот. Техрик-е талибан Пакистан, чадор-група за различни радикални сунитски исламистички групи, негираше дека го извршил нападот.
Жртвите биле префрлени на лекување во болниците во блискиот град Мастунг. Министерот за внатрешни работи Сарфраз Бугти ја нарече експлозијата „многу грозоморен чин“.
Во јули повеќе од 40 луѓе беа убиени во самоубиствен бомбашки напад во северозападниот дел на земјата на митинг на верска политичка партија.
Фото: Илустрација/EPA-EFE/FAYYAZ AHMAD