Предизвикана е материјална штета, но нема повредени лица, полицијата го расчистува случајот
Непознат сторител вчера неколку минути пред полноќ фрлил бомба во дворот на куќата на Габриел Бајрам, кој е актуелен кандидат за советник во град Скопје и е син на сега починатиот политичар, Амди Бајрам.
При експлозијата била направена материјална штета, но за среќа нема повредени лица.
Четириесетгодишниот Габриел, вчера го пријавил настанот во полиција, по што е сочинет и записник од страна на полициските службеници.
„Г.Б.(40) од Скопје пријавил дека на 02.10.2021 околу 23.56 часот во дворно место од куќа во негова сопственост на подрачје на Чаир непознат сторител фрлил експлозивна направа која предизвикала оштетување на ограда, врата, прозорци и фасада на куќата. Нема повредени лица. Известен е јавен обвинител и се преземаат мерки за расчистување на случајот“,
информираат од Министерството за внатрешни работи.
Габриел Бајрам (40) е на 10. (сигурно) место на советничката листа за град Скопје на коалицијата на СДСМ за претстојните локални избори.