Бојкот на наставата има во повеќе основни училишта, а за средните нема информации, велат родители од фејсбук-групата „Учебници и настава мора да има“, кои бараат стопирање на донесувањето на законот за учебници, со кој се предвидува дигитализација на учебниците.
„Имам многу информации од родители и наставници дека денеска воопшто не почнале со настава. Имам приватни податоци што ми стигнуваат и можеби 80-90 проценти денес нема да има настава кај основците. За средно немам доволно информации, рано е уште. Нашиот став е дека еден ден пропуштен во наставата не е толку значаен колку што е значајно да се донесат промени во образованието. Ќе стоиме зад сите наши дела сѐ додека не нѐ слушне Министерството“,
вели за МИА Драгана Спасевска, претставничката на неформалната фејсбук-група.
Од Министерството за образование, пак, во соопштение до јавноста апелираа на разумност и посочуваат дека бојкотот е неоправдан и на штета на учениците.
„По добиените информации дека изолирани групи ученици во неколку училишта во државата по насоки од родителите и старателите ја бојкотираат наставата, Министерството за образование и наука упатува апел за разумност и повторно приклучување кон останатите деца од нивните класови, затоа што постапката не оди во прилог на нивната едукација. Секој пропуштен час, особено сега кога воспитно-образовниот процес се организира во вонредни околности и во услови на пандемија, значи пропуштено знаење што тешко се надоместува. Причината за бојкотот на наставата е неоправдана, ако се има предвид дека дигитализацијата на образованието е глобален процес кој се случува во голем број земји во светот, а Северна Македонија мора да фати чекор со современите трендови и да се приближува кон стандардите за квалитет на образование кои ги наметнуваат развиените општества“,
се вели во соопштението.
Во соопштението се додава дека дигитализацијата на материјалите за учење е дефинирана во новиот закон за учебници и други наставни и дидактички материјали и предвидено е таа да се случува етапно, почнувајќи во четврто одделение од следната учебна година, така што, како што велат од МОН, во овој момент тоа воопшто не ги засегнува средношколците и тие немаат причина за отсуство од настава по таа основа.
„Законското решение кое се однесува на учебниците е во целосна согласност со потребите кои ги наметнува светот во кој тие живеат, а тоа е светот и ерата на дигиталната технологија и никој од нив не треба да поттикнува или поддржува отпор кон промени во чиј фокус е нивниот најдобар интерес и промени кои ќе ја унапредат наставата, интеракцијата помеѓу наставниците и учениците, ќе го намалат обемот на домашните задачи и работата на родителите и старателите со учениците и ќе донесат подобрување на севкупниот квалитет на националниот образовен систем. Апелираме учениците кои денес не се дел од часовите, да ја продолжат наставата и успешно да ја завршиме учебната година. Во меѓувреме, граѓаните да продолжат да ги следат информациите кои ги објавува МОН во врска со креирањето и имплементирањето на промените во образовниот систем, бидејќи сите други извори на информации, можат да бидат неточни и од манипулативна природа, со намера да поттикнат несакани реакции токму од страна на учениците и нивните семејства“,
се вели во соопштението.