Именувањето на директор со одлука на Владата е реализирана во сериозна и внимателна постапка ценејќи ги сите законски услови за именување директор. Одговорно тврдам дека во целост ги исполнувам сите законски услови за именување на оваа позција, вели новиот директор на АНБ
Обвинувањата и изјавите од одредени политички партии, базирани на шпекулации и претпоставки, се дневнополитички теми и не би сакал да коментирам и да продолжам понатаму, бидејќи секој мој коментар би значел одговор и дополнително навлегување подлабоко во теми во кои не е потребно да се навлезе, вели директорот на Агенцијата за национална безбедност (АНБ), Бојан Христовски, за барањата на опозициската СДСМ за негова оставка и сомневањата дека освен тоа што е партиско решение, тој не исполнува и други законски услови за да бие директор, како на пример, да има петгодишен раководен стаж и сертификат за соодветно познавање на англискиот јазик.
Тој вели дека одговорно тврди оти во целост ги исполнува сите законски услови за именување на позицијата и дека има речиси дведецениско искуство во безбедносниот сектор, од коe околу десет години раководен стаж во Управата за безбедност и контраразузнавање и Министерството за внатрешни работи, почнувајќи од приправник до раководител на сектор, како и државен советник во кабинетот на директорот на БЈБ и министерот за внатрешни работи.
„Именувањето на директор со одлука на Владата е реализирана во сериозна и внимателна постапка ценејќи ги сите законски услови за именување директор. Одговорно тврдам дека во целост ги исполнувам сите законски услови за именување на оваа позција. Имам сертификат за познавање на англиски јазик, како што е наведено во биографијата на Факултетот за безбедност“,
вели Христовски.
Во интервју за „360 степени“ на МРТ 1, на прашање зошто се стекнал со сертификат за познавање на англиски јазик во Пловдив, каде според тврдењата на опозициската СДСМ не постои центар за полагање ТОЕФЛ-тест, а не во Скопје, Христовски вели дека е спремен јавно да покаже документ кој е издаден во 2019 година, како регулатива од претходната власт, за административно тестирање на вработени во државната администрација кој точно покажува кој вид на тест од трите светски јазици кои се говорат и се потребни во државата, за кој вели дека го положил во 2022 година оти бил најбрз начин како да дојде до таа диплома, велејќи дека во Пловдив имало отворен термин за полагање.
„Во однос на моето образование, имам завршено факултет за физичка култура, факултет за економски науки и сум магистер во полето на безбедноста и криминалистика. Економскиот факултет го завршив во 2023 година, а ми е запишан години претходно и е диплома од факултет кој е акредитиран и еднаш годишно се акредитира и од сите претходни власти. Тоа е од Универзитетот за туризам и менаџмент или по ново мислам Универзитет ’Скопје’“,
кажа Христовски.
За билтенот на Факултетот за безбедност, во кој истиот ден кога беше обзнането дека Христвоски е именуван за директор на АНБ, беше објавено дека е избран и за асистент по криминалистички науки, тој рече дека постапката не е завршена, наспроти објавите во медиумите. Вели дека е избран за асистент од рецензионата комисија, но дека тоа допрва треба да биде потвредно од страна на научно-наставниот совет на факултетот.
За известувањето на ДКСК дека е отворен предмет по анонимна претставка за назначувањето на Христовски за директор на АНБ, тој одговори дека тој е отворен за соработка зашто е легалист, иако најверојатно главните прашања на антикорупциска ќе бидат насочени кон Владата.