Владата донесе одлука од денеска да се отворат сите гранични премини во земјата со примена на мерките што се активни
На граничниот премин „Табановце“ во последното деноноќие имало вкупно 2 444 патници, од кои 1 192 домашни и 1 252 странски државјани.
Претпладнево, како што јавува МИА, група македонски граѓани чекаа на влез во државата, а дел од нив имаа ПЦР-тестови. Патник кој покажа документи и тест пред новинарите вели дека го платил 97 евра, друг повозрасен патник платил 110 евра. Тие кажаа дека ќе мора да поминат 14 дена во самоизолација.
Група патници, кои влегуваа во државата од Германија, раскажаа дека ќе мора да одат во карантин бидејќи немаат направено тестови последниве 72 часа и најавија дека ќе направат тест во овластена установа во државата, пренесува МИА.
На вчерашната седница, Владата донесе одлука од денеска се отворат сите гранични премини во земјата со примена на мерките што се активни, при што за влез во Северна Македонија е задолжително да се приложи валиден негативен ПЦР-тест, не постар од 72 часа. Останува и мерката за потпишување изјава за задолжителна самоизолација во траење од 14 дена, врз основа на која Државниот санитарен и здравствен инспекторат подготвува решение за здравствен надзор и домашна самоизолација, која ја контролира МВР.
Согласно владината одлука останува во сила и мерката за државен карантин во траење од 14 дена, за сите граѓани или странци со регулиран престој во земјава, кои при влез на територија на Република Северна Македонија нема да приложат валиден тест.
Останува и можноста граѓаните кои се во државен карантин и што сакаат да им се направи ПЦР-тест на нивно барање, тоа да им се овозможи од страна на овластена институција во најкраток рок. Граѓаните со негативен тест потпишуваат изјава за задолжителна самоизолација во траење од 14 дена, каде што се пресметани и деновите поминати во државен карантин. Доколку граѓаните не сакаат да им се направи ПЦР-тест, остануваат во карантин 14 дена, а потоа им се изготвува решение за здравствен надзор и домашна самоизолација.
Владата вчера го дополни и Протоколот за непречен транзит на странски државјани низ територијата на Северна Македонија.