Во реакција на најавениот протест, од Основниот кривичен суд Скопје преку писмено соопштение наведоа дека го почитуваат уставно загарантираното правно на мирен собир, но, истовремено рекоа дека во конкретниот случај пресудата е донесена во транспаретна постапка, каде обвинетиот во присуство на својот бранител доброволно ја призна вината
Група граѓани, меѓу кои роднини и пријатели на Фатон Љури, денеска протестираа пред Основниот кривичен суд Скопје. Тие на мирниот протест го искажаа своето незадоволство и несогласување со затворската казна од 11 години што Кривичен му ја изрече на Љури во понеделникот (29 декември 2025 г.) за сообраќајката во која тој во јули со мотор, без возачка дозвила, на пешачка патека смртно го прегази 68-годишниот Југослав Николовски.
Протестот, групата граѓани, го започнаа од населбата Чаир, од каде носејќи транспарентни на кои пишуваше „Правда за Фаон Љури“, „Правда под притисок не е превда“ и извкувајќи „Сакаме правда“, пристигнаа пред зградата на скопскиот Основен кривичен суд.
Оттаму тие испратија пораки и до судијката и обвинителката, наведувајќи дека изречената казна е превисока.
„Денеска сме собрани тука за да кажеме дека сме револтирани од казната што му беше изречена на нашиот другар Фатон Љури. Зошто да се казни 24-годишен млад човек кога несреќата се случила несакајќи. Тоа може да ни се случи на сите“,
рече Фатмир Јашари, еден од присутните на протестот.
Тој додаде дека и претходно имало вакви случаи во кои обвинетите биле казнети со минимални казни, а како пример го наведе случајот со Бобан Илиќ кој во 2016 прегази четигодишно дете во Куманово, по што беше осуден на шестгодишна затворска казна. Овој случај тогаш предизвика тензии и протести во Куманово, а на Илиќ му се судење два пати, првично за убиство, а потоа за тешки дела во сообраќајот.
„И порано имало вакви случаи во кои лицата беа казнети со минимални казни, како што беше случајот со Бобан Илиќ кој уби четигодишно дете. До кога ќе биде оваа неправда од државата кон нас“,
кажа Јашари.
Претходно денеска, во реакција на најавениот протест, од Основниот кривичен суд Скопје преку писмено соопштение наведоа дека го почитуваат уставно загарантираното правно на мирен собир, но, истовремено рекоа дека во конкретниот случај пресудата е донесена во транспаретна постапка, каде обвинетиот во присуство на својот бранител доброволно ја призна вината.
Признанието вина, како што наведоа оттаму, е правен институт кој влијае на текот на постапката и одмерувањето на казната согласно Кривичниот законик, како и дека Судот одлучува исклучиво врз основа на докази и законски одредби.
„Изразување на незадоволство преку јавни собири е легитимно право на секој граѓанин, но било каков обид за притисок, не смеат и нема да влијаат врз независното судско одлучување. Судскиот систем предвидува правни механизми за незадоволните страни. Секоја странка која смета дека висината на изречената санкција не соодветствува со делото, има право на жалба до повисокиот суд. Тоа е единствениот легален пат за преиспитување на една пресуда. Апелираме до учесниците на протестот на достоинствено и мирно однесување, со почит кон институцијата и вработените кои ги извршуваат своите работни задачи. Целта на овој суд е и ќе остане неселективна правда и доследно спроведување на законите“,
рекоа од Кривичен во соопштението.
Судот во понеделникот го прогласи Љури за виновен за кривичното дело тешки дела против безбедноста на луѓето и имотот во сообраќајот од член 297 став 1, во врска со член 300 став 2 од Кривичниот законик.
Според пресудата, обвинетиот управувал мотоцикл без регистарски таблички и без возачка дозвола по пешачка патека на улицата „Јордан Хаџи Константинов – Џинот“, површина наменета исклучиво за пешаци, со брзина од 35 километри на час. Притоа, со страничниот дел од мотоциклот удрил во пешакот Југослав Николовски, кој како последица од тешките повреди на черепот и мозокот подоцна починал во Клиничкиот центар „Мајка Тереза“.
Читајќи ја пресудата, судијката Снежана Марковска ги наведе отежнувачките и олеснувачките околности што биле земени предвид при нејзиното донесување и одмерување на казната. Како отежнувачки околности таа го наведе поранешен живот на Љур, кога бил правосилно осуден за непочитување мерки во време на пандемија, како и тоа дека против него се води постапка за неукажување помош на лице повредено во несреќа.
Како олеснувачки околности за висината на казната судијката ги наведе признанието вина и искреното каење. Сепак, таа потенцира дека за вакви сообраќајни несреќи со смртни последици е потребна построга казнена политика.
Обвинетиот Фатон Љури на едно од претходните рочишта призна вина за делото тешки дела против безбедноста на луѓето и имотот во сообраќајот, а за делото неукажување помош на лице повредено во сообраќајна незгода судењето продолжува.