Од Обвинителството велат дека одлуката за одмрзнување на паричните средства била донесена дури два месеци откако фирмата ја поднела жалбата и на истиот ден кога Основното јавно обвинителство Битола во Судот поднесе обвинение против 10 лица за злоупотреби при јавни набавки за избор на фирма за ископ на јаловина во РЕК „Битола“, а преку кои постои сомнение дека била стекната значителната имотна корист
Судечкиот судија во предметот, по интервенцијата на Обвинителството, го прифатил предлогот и донел решение одново да ги замрзне паричните средства на сметката на РУД-КОП
Кривичниот совет на Основниот суд Битола донел решение со кое ја преиначил претходната одлука на судија на претходна постапка за замрзнување на околу три милиони евра од сметката на битолската фирма РУД-КОП, опфатена во постапката за која Основното јавно обвинителство Битола неодамна поднесе обвинение против 10 лица поради злоупотреби во РЕК „Битола“.
За ова денеска преку писмено соопштено информираа и Јавното обвинителство.
Оттаму велат дека поради ваквата одлука Основното јавно обвинителство Битола вчера одново побарало од тамошниот Суд да донесе одлука со која ќе ги замрзне паричните средства од сметката на РУД-КОП бидејќи, како што се наведува, постои основано сомнение дека се незаконски стекнати преку кривично дело злоупотреба на службената положба и овластување од членот 353 од Кривичниот законик.
„Постапувајќи по жалба на правното лице (РУД-КОП н.з.), Кривичниот совет на Основниот суд во Битола донел решение со кое ја преиначил одлуката на судијата на претходна постапка и дозволил одмрзнување на паричните средства, а во замена е определена мерка – забрана за располагање и оттуѓување на недвижен имот и моторни возила во сопственост на правното лице“,
се вели во соопштението од Јавното обвинителство на Република Северна Македонија.
Според соопштението, за одлуката на Кривичниот совет на битолскиот суд, ОЈО Битола ниту било известено, ниту имало право на жалба.
Од Обвинителството велат дека одлуката за одмрзнување на паричните средства била донесена дури два месеци откако фирмата ја поднела жалба и на истиот ден кога Основното јавно обвинителство Битола во Судот поднесе обвинение против 10 лица за злоупотреби при јавни набавки за избор на фирма за ископ на јаловина во РЕК Битола, а преку кои постои сомнение дека била стекната значителната имотна корист.
Со обвинението се предлага одземање на таа корист доколку биде донесена осудителна пресуда.
„Надлежниот јавен обвинител од Основното јавно обвинителство Битола смета дека со донесеното решение на Кривичниот совет за одмрзнување на паричните средства се оневозможува односно се прави целосно неизвесна идната евентуална конфискација на овие парични средства како директна имотна корист од кривичното дело“,
велат од Обвинителството.
Дополнително, како што се додава, со преиначување на првично определените мерки Судот дозволил во замена за паричните средства да биде замрзнат имот – една парцела во индустриска зона и 37 возила за кои воопшто не постои доказ дека се стекнати по извршување на кривичното дело или дека имотната корист била употребена за нивна набавка.
Имено, станува збор за возила од кои повеќето се произведени во 2007 и 2008 година, а дел и во 1990-тите години од минатиот век што никако не упатува дека биле предмет на кривично дело кое согласно обвинението било извршено во 2022 и 2023 година.
Поради ова Основното јавно обвинителство Битола реагирало итно, веднаш штом дознало за донесената одлука на Кривичниот совет и ги известило Управата за финансиска полиција и Управата за финансиско разузнавање, а веднаш бил доставен и нов предлог до Судот за обезбедување на имотната корист додека трае постапката.
Судечкиот судија во предметот го прифатил предлогот и донел решение одново да ги замрзне паричните средства на сметката на РУД-КОП, информираат од Обвинителството.