Лажното видео најверојатно е направено со помош на т.н. „дип фејк“ технологија што доколку биде потврдено ќе биде првиот таков инцидент од почетокот на воените дејствија во Украина
На социјалните мрежи се појави лажна снимка на која украинскиот претседател Володимир Зеленски ги повикува украинските војници да го положат оружјето.
Иако неговите усни се движат синхронизирано со аудиото, главата на Зеленски изгледа како да е монтирана, а и гласот не звучи ниту како неговиот.
Лажната снимка се појави на вебстраницата на украинскиот ТВ канал „Украина 24“ претходно во текот на денот, а текстот на пораката бил накратко емитуван и на ТВ.
„Украина 24“ во соопштението рече дека нејзината вебстраница и тикер биле хакирани.
Зеленски веднаш го отрфли обраќањето како лажно, велејќи дека „може само да предложи руските војници да го положат оружјето и да си одат дома“.
Службата за безбедносни протоколи на „Мета“, компанијата што е сопственик на платформите Инстаграм и Фејсбук, соопшти дека била забележана и избришана лажна видеопорака.
Лажното видео најверојатно е направено со помош на т.н. „дип фејк“ технологија што доколку биде потврдено ќе биде првиот таков инцидент од почетокот на воените дејствија во Украина.
„Наша екипа идентификуваше и отстрани „дип фејк“ видео кое го прикажува претседателот Зеленски како објавува изјава што никогаш не ја дал. Се појави на компромитирана мрежна станица и се прошири низ Интернет“,
објави на Твитер, Натаниел Глејшер, одговорниот за безбедноста во „Мета“.
Тој додава дека видеото било прегледано и за брзо време отстрането бидејќи го прекршува правилникот на компанијата против објавување видеа на заговор и манипулации, појави за кои веќе се предупредени и останатите социјални платформи.
Се е поголема загриженоста за употреба на „дип фејк“ технологијата за манипулативни активности и влијание врз јавното мнение. Иако самото видео не се очекува да има некое поголемо влијание, би можело да биде показател на она што се почесто може да се случува во иднина.