Вицепремиерот за економски прашања, сепак, не ја отфрли можноста и тоа да се случи, но само доколку такво нешто се појави како потреба од разговорите со стопанските комори
Во овој момент Владата не размислува за седми пакет економски мерки за помош на стопанството и граѓаните за справување со последиците од корона-кризата, изјави денеска вицепремиерот за економски прашања Фатмир Битиќи, но, сепак, не ја отфрла можноста за тоа ако од разговорите со стопанските комори се појави таква потреба.
„Разговори ќе имаме. Секојдневно разговарам со стопанските комори и ако навистина тоа е нужно ќе направиме одредена мерка зашто не знаеме колку ова привремено лимитирање на движење на граѓаните ќе влијае. За жал сме и во предизборен период и секоја мерка може да се протолкува различно и затоа нема да кажам дали ќе има или нема да има мерка. Само потврдувам дека се разговара и ако е вистински потребно заедно ќе ја донесеме“,
рече Битиќи во одговор на прашање при денешното означување на почетокот на тендерската постапка за изградба на клучка на крстосницата меѓу булеварот „Словенија“ и „Качанички пат“.
Порача дека и претходно докажале дека секој загубен денар во секој сектор ќе се врати кога тоа ќе биде потребно. Но кога станува збор за здравјето на граѓаните, тоа е пред се.
„Ако треба да се прави компромис помеѓу економска мерка за угостители и здравјето на граѓаните, здравјето на граѓаните е пред се. Затоа ќе седнеме и ќе разговараме. Сметам дека во овој момент сите треба да сме подготвени нешто да оставиме наспроти борбата што не чека против енормното зголемување на бројот на заразени од коронавирусот и секојдневната борба за живот која е многу поважна од се друго“,
рече Битиќи, додавајќи дека и досега угостителскиот и туристичкиот сектор е помаган, и тоа во изминатите пакети, со повеќе од 14 отсто од вкупната помош која е дадена во стопанството, наспроти нивниот придонес во БДП кој е многу помал.