„Кога Владата станува најголем должник, било по основ на поврат на ДДВ, било по основ на договорни обврски, тоа е сериозен проблем за економијата затоа што предизвикува неликвидност во стопанството и намалување на активноста“, вели пратеникот
Постојат сериозни проблеми со јавните финансии и економската политика на Владата, вели пратеникот на СДСМ и поранешен вицепремиер за економски прашања Фатмир Битиќи.
Според Битиќи, реалноста е дека државата е влезена во циклус во кој од шест до девет месеци има невраќање на ДДВ и неплаќање на обврски кон стопанството. Тоа, како што вели Битиќи, Владата не го кажува, а го кажуваат самите стопанственици.
„Кога Владата станува најголем должник, било по основ на поврат на ДДВ, било по основ на договорни обврски, тоа е сериозен проблем за економијата затоа што предизвикува неликвидност во стопанството и намалување на активноста“,
рече Битиќи во вчерашното гостување во емисијата „24 анализа“ на ТВ 24.
Тој вели дека факт за ова е податокот за индустриското производство за февруари од минус 0,8 отсто и додаде дека доцнењето на повратот на ДДВ кон стопанството е незаконски.
Битиќи вели дека економскиот раст кој Владата го најавува не се заснова на индустрија и стопанство, туку на јавни инвестиции, кои исто така потфрлаат.
„Нормално е проекциите на Светска банка да бидат такви какви што се, а тоа е да кажат дека годинава ако завршиме на ниво од 2,6 отсто можеме да бидеме среќни како држава. Проекциите се базираат на реалната можност за спроведување на инвестициите, а не на пропаганда“,
рече Битиќи.
Во врска со доцнењето на исплатата на платите во дел од јавниот сектор, Битиќи вели дека се сака пред јавноста да се каже дека само се случил административен пропуст, но според него реалноста е дека еден од инспекторатите, кој е под Министерство за економија, четири месеци нема земено плата.
Тој потсети дека законски рок за усогласување со Законот за организација и работа на органите на државната управа е шест месеци и праша:
„Нели оваа влада работи законски, како по 10 месеци уште ќе се усогласуваме и поради тоа не се исплатени платите?“
Тој исто така нагласи дека кога се зборува за јавни финансии мора да се гледа што се случува во секој сегмент – платите, пензиите, социјалните давачки и функционирањето на стопанството.
Во однос на задолжувањето, Битиќи посочи на зачестената динамика на задолжување на Владата кај домашните банки.
„Да земеме еден сегмент кој никој не сака да го каже – од 8 октомври 2024 година кога е потпишан договорот во Будимпешта за една милијарда задолжување, од тој ден до денес се издаваат 17 државни обврзници, нивната вкупна вредност е 27,9 милијарди денари или 453 милиони евра. Дополнително, само во март од Шпаркасе банка земени се и 70 милиони евра“,
рече Битиќи.
Битиќи заклучи дека буџетот се полни преку нови задолжувања, а не преку здрави приходи предупредувајќи дека годинешниот дефицит според долгогодишната стратегија за управување со јавни финансии и фискалната консолидација не укажува, што е една од забелешките на ММФ, дека како земја доцниме во фискалната консолидација затоа што во суштина буџетскиот дефицит го надминува тоа што треба да го имаме.