„Не, не најавувам ништо, јас само верувам дека стратешките инвестиции се добри за државата, дека енергетската транзиција не може да се случи без приватни инвестиции и ова е токму тоа“, вели вицепремиерот прашан дали најавува дека СДСМ и ВМРО-ДПМНЕ, без ДУИ, може да ги изгласаат предлог-законите за стратешки инвестиции во областа на енергетиката
360: На темата за стратешките инвестиции во енергетиката, ќе почнам со прашањето – зошто министрите на ДУИ не беа на седницита на која повторно ги утврдувавте предлог-законите?
Битиќи: Мислам дека прашањето треба да биде кон самите министри на ДУИ.
360: Како некој што претседавал со таа седница, како го објаснувате тоа?
Битиќи: Не, искрено, не ми е јасно, немам објаснување освен дека во истиот временски период имаа друг настан на кој слушнав потоа дека биле повикани. Затоа, одредени заменици од ресорните минситерства беа на самата седница.
360: Сите знаеме дека министерот Бектеши, кој беше првичниот потписник на тие предлог-закони, јавно изрази резерва барем за еден од нив, потоа на негово барање законите беа повлечени од Собранието, па дојдоа повторна на Влада и со ваш потпис сега повторно се вратени во парламентот. Така што, да го сведуваме отсуството на министрите на ДУИ на присуство на друг настан е малку наивно објаснување.
Битиќи: Имамe официјален допис зошто се бара да се вратат законите, особено за еден. а тоа е дека во времето кога биле испратени во Собрание недостигало мислење на Државното правобранителство.
360: И еве го обезбедивте.
Битиќи: Таа било обезбедено и во меѓувреме, позитивно мислње од Државното правобранителство, не само за еден за сите, и јас тогаш реков – ќе ги повлечеме сите за да обезбедиме дека нема недостаток на одредени мислења од Државното правобранителство.
360: Ако таа било главната причина за Бектеши, зошто не остана на таа седница на Владата, зошто не ги потпиша повторно законите, па со негов потпис да одат во парламентот?
Битиќи: Не, значи предлагач на законите е Министерство за економија и тоа не е променето затоа што во Законот за стратешки инвестиции е пропишано од кои ресори, кое линиско министерство може да биде предлагач, и тоа не е сменето – информацијата во системот на е-влада, законот првичниот е предложен од Министерството за економија, повлекувањето на законските решенија се прави од страна на Владата и Владата понатаму во тој момент ги враќа во собраниска процедура.
360: Но, името на Крешник Бектеши не е на законите како некој којшто ќе ги брани во Собранието ако формално Министерството за економија е предлагач.
Битиќи: Како што и претходно бев јас, едноставно јас како кординатор назначен од страна на Владата, како кординатор за стратешките инвестиции да ја водам комисијата за стратешки инвестиции, секако сум еден од низата министри коишто биле вклучени во целиот процес. Одлуката беше низ разговори претходно дека јас, како кординатор на комисијата за стратешки инвестиции и на самите проекти, дека ќе бидам и повереникот во Собрание.
360: Уште една информација што оди во прилог на тоа дека ДУИ има резерва за законите. Имаше обид во Собрание законите да се најдат на седница на комисија, но немаше кворум, меѓу другото затоа што не дојдоа пратениците на ДУИ?
Битиќи: Не дојдоа, јас бев присутен на самата комисија, за изненадување затоа што на комисијата беше точката и за Националната развојна стратегија којашто ја работиме некаде речиси три години, стратегија за следниот период од 20 години во којашто навистина имаме постигнато голема инклузивност. Искрено, не добив одговор зошто тие не дојдоа, јас не сакам да верувам дека сега ќе треба да правиме политички договори за работи што се битни за граѓаните.
360: Кога спомнувате веќе политички договори, можно ли е тие да бараат пазар – вие да ги поддржите измените во Законот за игри на среќа, а тие предлог-законите за стратешки инвестиции?
Битиќи: Од мене сигурно нема да го побараат.
360: Ќе бараат во партија, веројатно.
360: Сте чуле ли дека од една опозициска партија барале на комисијата да се сменат приоритетите на дневниот ред, па таа инвестиција којашто била прва да се симне подолу, а друга да се стави прва? Немате чуено такво нешто?
Битиќи: Не, слушнав, ама јас тоа не го гледам како проблематично.
360: Тоа нели ви е индикација дека, сепак, е можно опозицијата да ги поддржи или барем дел од предлог-законите?
Битиќи: Не, не, значи таа е на комисиска расправа, во комисијата за економски прашање, искрено по Деловник два дена може да трае расправата по еден закон. Јас кажав дека ќе бидам присутен таму, ќе ги разговараме, ако има дури добри амандмани, имаа одредени амандмани веќе предложени, ги гледаат службите – може да расправаме по нив.
360: Ова е најава дека СДСМ и ВМРО може да ги изгласат стратешките инвестиции без ДУИ?!
Битиќи: Не, не најавувам ништо, јас само верувам дека стратешките инвестиции се добри за државата, дека енергетската транзиција не може да се случи без приватни инвестиции и ова е токму тоа. Жалам што процесот на преговори траеше предолго за сите стратешки инвестиции и времето на носење се совпаѓа со некој предизборен период. Да беа изборите во нормални услови, некаде таму во јуни, ова ќе се случуваше, нели, на почетокот на годината.