Советникот на претседателот на Владата Фатмир Битиќи, кој воедно е и претседател на партиската комсиија за финансии во владејачкиот СДСМ, денеска оцени дека сетот економски мерки, меѓу кои и вчера објавениот ребаланс на Буџетот е со цел трансформација на македонската економија за излез од кризата предизвикана од пандемијата со ковид-19.
Тој наденешната прес – конфренција ги образложи сите ставки кои се опфатени во ребалансот, односно кои области од македонската економија ќе добијат повеќе средства:
-дополнителни 3 милијарди денари од ковид – програмата се за стимулација на приватната потрошувачка за поддршка на македонската економија и на македонските производи и услуги;
-дополнителни 600 милиони денари за Министерството за економија за поголема поддршка на македонскиот туризам;
-350 милиони денари за социјална заштита поврзана со ефектите од ковид-19 и исто толку и за Фондот за здравство;
-300 милиони денари за Министерството за здравство за зајакнување на здравствените капацитети за откривање на болести преку обезбедување на техничка експертиза, лабораториска опрема и системи за откривање на случаи во согласност со упатствата на СЗО;
-дополнителни 350 милиони денари за Министерство за образование во ковид- програмата за младите да се стекнат со ИТ и дигитални вештини кои ќе им овозможат брзо вработување во новата економија;
-алоцирање и 150 милиони денари за исплата на надомест за невработеност во Агенцијата за вработување и 60 милиони денари за национално кофинансирање за нова кредитна линија преку Развојната банка;
-расходите за стоки и услуги се намалени за 1,8 милијарди денари во однос на планот за 2020 година а тековните трансфери се планирани на ниво од 166 милијарди денари или за 9,6 милијарди денари повисоки во однос на планот за 2020 година, како резултат на обезбедување на средствата за економските мерки;
-капиталните расходи се планирани на ниво од 19,5 милијарди денари или 4,2 милијарди денари пониски во однос на планот за 2020 година, што е всушност на ниво на максимално реализирани капитални расходи во изминатите 10 години.
-финансирање на буџетскиот дефицит со поволни средства од меѓународни финансиски институции, повлекување на средства на домашен пазар преку државни хартии од вредност, како и со излегување со еврообврзница на меѓународниот пазар на капитал,
-очекуван економскиот раст од -3,4%.
„Ребалансот на буџетот за 2020 година има една јасна цел – забрзување на процесот на опоравување на македонската економија преку финансирање на мерките за надминување на последиците од корона кризата. Многу поважно, овој ребаланс ќе овозможи брза трансформација но и зголемување на конкурентноста на македонската економија“, изјави Битиќи на денешната прес конференција.
Вчера министерката за финансии Нина Ангеловска го објави ребалансот на Буџетот според кој приходната страна на буџетот се намалува за 11,5% и истата изнесува 196,8 милијарди денари, додека расходната страна се зголемува за 1,4% и истата изнесува 242,9 милијарди денари.
Буџетскиот дефицит е проектиран на 6,8% и е во линија со проекцијата на Европската комисија.
Од опозциската ВМРО-ДПМНЕ оценија дека ребалансот на буџетот доаѓа со задоцнување од најмалку месец и половина.