Поранешниот вицепремиер упати и благодарност до партијата на Мицкоски затоа што, како што вели, ги потврдува и ги продолжува планираните инвестиции кои неговиот поранешен кабинет ги сработил во изминатиот период
Поранешниот вицепремиер за економски прашања и актуелен пратеник во Собранието, Фатмир Битиќи, обвини оти премиерот Христијан Мицкоски се кити со туѓи перја објавувајќи ја инвестицијата на германската компанија „Епсотек“ која во земјава ќе инвестира во изградба на нов производствен погон.
„Да, да: има разлика! Некој се ‘кити со туѓи перја’ и ја објавува инвестицијата на ‘Епсотек’ како своја (и тоа пред да се финализирани сите процедури), а некој чека(л) додека се изјаснат сите релевантни институции за да се потврди договорот за соработка“,
пишува Битиќи во објавата на Фејсбук.
Ексвицепремиерот упати и благодарност до партијата на Мицкоски затоа што, како што вели, ги потврдува и ги продолжува планираните инвестиции кои неговиот поранешен кабинет ги сработил во изминатиот период.
„Работа, а не пиар е потребна за нашата татковина да го доживее прогресот што го заслужува“,
додава Битиќи.
Во објавата на Фејсбук, Битиќи посочува дека заедно со германски „Епсотек“ има уште шест други инвестиции за кои се изработени договори за поддршка и кои го чекаат последниот филтер во Комисијата за заштита на конкурентноста, а кои досега не биле објавени во јавноста од, како што вели, принципиелни причини.
Претходно денеска премиерот Христијан Мицкоски најави дека денеска официјално ќе биде објавена инвестицијата на германската компанија „Епсотек“ во партнерство со белгиски АИМ која во земјава ќе инвестира во изградба на нов производствен погон.