Битиќи нагласи дека граѓаните имаат одредени навики за храна и посочи оти во одредени земји сладолед, чипс и мастики спаѓаат во нездрави производи затоа што имаат повисока шеќерна вредност и тоа не е здраво за населението, па затоа имаат трипати повисоки даночни стапки
Од МФ велат дека списокот со производи што ќе се оданочуваат со повластена стапка од 10 отсто се производи кои не претставуваат производи за основна исхрана односно имаат карактеристика на производи кои не се дел од секојдневната трпеза, а дел од нив не се препорачуваат за човековото здравје
Не е вистина дека има зголемување на цената за илјада производи и тоа го кажувам и цврсто стојам на тоа затоа што се опфатени 358 категории на производи, изјави денеска вицепремиерот за економски прашања Фатмир Битиќи. Според него, граѓаните најмногу реагираат за зголемувањето на ДДВ од 5 на 10 отсто за 10 прехранбени производи кои се опфатени со одлуката за зголемено ДДВ и вели дека нема никаков проблем Владата уште на наредната седница во вторник да направи измена на одлуката за тие производи.
„Дел од нив се опфатени со мерките за намалување на цените и без разлика што има зголемена даночна стапка кај одредени производи ќе останат на истата референтна цена која што спаѓа под одлуката така што нема да биде толкаво покачувањето. Врз основа на она што наслушнав досега има три одлуки на одредени производители со иста цена да останат продуктите коишто се со ревидирана цена, дел се зголемуваат. Ги поттикнувам сите стопански комори, сите производители, па и граѓаните до соодветните институции да пратат предлози за кои производи да испаднат од предлог-одлуката за изменување на стапката на ДДВ и соодветно ќе го направиме тоа. Навистина не влегуваме во дефинирање што е луксуз, за кого е луксуз. Може да е пропуст во еден момент, може да не е. Има одредена реакција за одредени продукти. Штом ја добиеме таа листа на продуктите веќе во вторник кога имаме закажана седница на Влада може да се ревидира одлуката. Но, сметам дека досега реакциите се отприлика за 10 до 15 продукти, не гледам голем проблем за 10-ина продукти да има корекција“,
рече Битиќи во одговор на новинарско прашање пред почетокот на Економскиот форум „Од криза до решенија: Станавме ли поотпорна економија денес?“ во организација на „Фајнанс тинк“.
Тој нагласи дека граѓаните имаат одредени навики за храна и посочи оти во одредени земји сладолед, чипс и мастики спаѓаат во нездрави производи затоа што имаат повисока шеќерна вредност и тоа не е здраво за населението, па затоа имаат трипати повисоки даночни стапки.
„Ние не го правиме тоа, но не сметаме дека овие производи спаѓаат во основни прехранбени производи“,
рече Битиќи.
Тој се согласува дека некои од производите не треба да бидат во графа луксузни, а некои не.
Според него, одлуката има два дела – продукти коишто спаѓаат во повластена даночна стапка од 5 отсто и таму е дефинирано за разлика од претходното дефинирање во законот.
„Понатаму, можам да ве насочам во одлуката која е на 66 страници. Има вкупно 358 продукти или царински тарифи со одредени продукти кои спаѓаат во новата стапка од 10 отсто. Ако трговците и производителите различно ја прочитале или не е доволно јасна, ние можеме истата да ја објасниме и на следната владина седница да го решиме тоа“,
додаде вицепремиерот за економски прашања.
МФ: Основните прехранбени производи и понатаму ќе се даночат со најниска повластена стапка од 5 отсто
Со реакција се јавија и од Министерството за финансии (МФ). Оттаму нагласуваат дека основните прехранбени производи, кои се дел од секојдневната употреба на граѓаните, и понатаму ќе се оданочуваат по најниска даночна стапка на ДДВ, односно нема промена и таа останува на 5 отсто како што тоа е предвидено со Законот за Данок на додадена вредност и поблиску дефинирано со Одлуката за определување на добрата и услугите кои подлежат на повластена стапка на ДДВ која Владата ја донесе на 28 септември, а која стапува на сила од денеска.
Одлуката содржи над 1 600 производи, кои со новата одлука ќе продолжат и понатаму да се оданочуваат со најниската даночна стапка од 5 отсто, посочија од МФ.
„Тука спаѓаат месо – говедско и свинско, кланични производи во саламура, чадено и сушено, риба – пастрмка, крап, други слатководни риби, ослич, млеко, павлака, кисело млеко, јогурт, ќефир, сирење, најголем дел од кашкавалот, путер, јајца, природен мед, желудници, зеленчукот и овошјето, урми, смокви, агруми (портокали, лимон, мандарина, грејпфрут), брашно од пченица и и брашно од жита, пченица, јачмен, рж, ориз, пченка, соја, кикиритки, сончогледово масло, маслиново масло, пченкарно масло, маргарин, колбаси и други конзервирани производи од месо, конзервирани риби – туна, сардина, сардинели, паплини, шеќер, какао во прав, тестенини, леб, бисквити, ајвар, конзервирани кратставици и корнишони, кисела зелка, конзервирани печурки, слатки пиперки, џемови и слатка, кечап и други сосови од домат, супи, оцет, сол, ореви, костени… На листата меѓу другото се и семенски материјал, ѓубрива, земјоделски алати и механизација, а истата е дополнета со менструални производи а додека пак прометот на пелетите за греење останува да се оданочува со 5 отсто“,
се наведува во соопштението на МФ.
Листата на производи коишто ќе се оданочуваат со повластена стапка од 10 отсто, додаваат од министерството, се производи кои не претставуваат производи за основна исхрана односно имаат карактеристика на производи кои не се дел од секојдневната трпеза, а дел од нив не се препорачуваат за човековото здравје.
„На оваа листа меѓу другите се различни производи од лосос, козјо месо, посебни видови на туна кои се ретки, и кои не се во општа употреба, бадеми, индиски ореви, бразилски ореви, тропско овошје, некои видови зачини, палмино масло, кавијар, посебен вид на кашкавали кои не претставуваат традиционален производи и се од растително потекло и слично. Исто така, поместувањето на некои од производите на оваа листа се со цел и заштита на домашното производство и заштита на економијата“,
појаснуваат од Финансии и додаваат дека примената на овие две одлуки не влијаат на донесената одлука на Владата за замрзнати цени на основните производи, затоа што тие производи опфатени со владината одлука се дел од листата со повластена даночна стапка од 5 отсто и кај нив нема промена.
Во јавноста вчера се крена голема прашина откако Сител телевизија ја објави листата на „луксузни“ производи за кои ДДВ со последните законски измени се зголемува од 5 на 10 отсто. На листата, според Сител, се наоѓаат брашно, сирење, конзерви, детска храна…
Од опозициската ВМРО-ДПМНЕ реагираа дека премиерот Димитар Ковачевски ги поскапел сите производи за да го полни буџетот за крадење.
„Владата лажеше кога велеше дека ставката на ДДВ од 10 отсто ќе биде само за луксузни производи како перки од ајкула. Наеднаш луксуз за оваа влада станаа брашното, џигерот и сладоледот. За власта богати се сите граѓани кои јадат замрзнатите теста, млечни и сирни намази, сирење и урда, зденка, пармезан, ајдемер и гауда кашкавал, павлака за готвење, растителните сирења и намази, па затоа истите ќе треба да плаќаат по 10 отсто ДДВ за овие производи. Не знаеме како и лутеницата, цвеклото, фефероните, мајонезот, сите видови апетисани, компоти, конзервирана храна, полнети макарони, тортиљи и нудли станаа луксуз според Ковачевски, па народот ќе треба да ги плаќа поскапо“,
реагираа од најголемата опозициска партија.