Битиќи најави ребаланс на буџетот и ново задолжување
Етничкиот клуч за вработување во приватниот сектор, не одговара на модерна, развојна и конкурентна економија, туку за тоа е најважна компетентноста и професионалноста, вели вицепремиерот за економија, Фатмир Битиќи во емисијата „Трилинг“ на ТВ24.
„Во владината програма стои дека Владата ќе се осигура да креира афирмативни мерки за категории на граѓани со различности во нашата економија. И јас тоа го кажувам. Но, не гледам омекнување затоа што тврдам дека јас стојам позади тоа дека клуч по етничка основа не може да биде клуч кој што одговара на модерна, развојна и конкурентна економија, туку компетентноста и професионалноста е клучот за сето тоа“,
рече вицепремиерот Битиќи.
Битиќи најави и ребаланс на буџетот и ново задолжување, поради новиот пакет антикризни мерки.
„Ребаланс секако треба да има, затоа што ние спремаме нов пакет на економски мерки , затоа што е тоа потреба на граѓаните, тоа е потреба на економијата за справување со економските последици од коронавирусот“,
рече Битиќи.
Според него, на задолжувањето на државата не треба да се гледа само низ процентуалната задолженост, туку оти е клучно дали со задолжувањето ќе се решаваат проблеми на граѓаните, дали средствата ќе се лоцираат токму таму каде е најпотребно или средствата од задолжувањето ќе се користат за непродуктивни и неефикасни трошења.
Тој е уверен дека државата е во состојба да ги враќа долговите.
„Велам да. Ќе може да се враќаат кредитите. Пред некој ден имавме дебата меѓу ресорните министри и заклучокот е едноставен. Има задолжувања со историски највисоки каматни стапки во изминатиот период. Денеска на меѓунардниот финансиски пазар има за пет пати поефтини кредити. Било кој и најнеук да е и да го водел само своето семејство, ако некој му каже дека има поефтини пари наспроти тие кои завчера, ќе ги земе поефтините за да ги рефинансира постоечките, затоа што заштедата ќе му овозможи да реши одредени проблеми“,
вели Битиќи.