Тој прецизира дека РКЕ ќе направи проверка дали цената е соодветно пресметана и ќе укаже каде има потреба од корекции ако има отстапувања. Но формулата, како што истакнува Бислимоски, е јасна за сите енергетски компании
Новата одлука за цената на електричната енергија за домаќинствата и малите потрошувачи ќе ја објави Универзалниот снабдувач – „ЕВН хоум“, откако претходно Регулаторната комисија за енергетика (РКЕ) ќе направи проверка дали е соодветно пресметана, изјави денеска претседателот на РКЕ, Марко Бислимоски.
„Регулаторната комисија за енергетика со новата одлука во декември ќе стартува да ја применува ЕУ-практиката според која како обврска на регулаторот е дефинирање на тарифите за пренос и дистрибуција, а крајната цена во која влегуваат сите елементи ќе ја соопшти Универзалниот снабдувач – ‘ЕВН хоум’“,
вели Бислимоски во изјава за МИА.
Тој прецизира дека РКЕ ќе направи проверка дали цената е соодветно пресметана и ќе укаже каде има потреба од корекции ако има отстапувања. Но, формулата, како што истакнува Бислимоски, е јасна за сите енергетски компании.
Ниту едно регулаторно тело, додава тој, не ја кажува крајната цена, освен во Србија, можеби и Косово.
Бислимоски вчера во своето гостување на ТВ 24 изјави дека ќе нема промена на опсегот на четирите блок-тарифи за електричната енергија на регулираниот пазар и покрај забелешките на Меѓународниот монетарен фонд (ММФ).
„РКЕ го носи тарифниот систем и кажува во кој опсег ќе се блок-тарифите. Да, има забелешки од ММФ дека блоковите треба да се намалат, но одговорно тврдам – блоковите и нивниот опсег нема да се намалат. Не е тоа решение. Блоковите даваат резултати. Воведената реформа има ефект и има заштеди од 16 отсто. Дури и тоа што беше потопла зимата има удел, но сепак до овој процент е стигнато со штедење на домаќинствата и факт е дека потрошувачката е намалена“,
рече претседателот на РКЕ.
Според него, намалувањето на субвенциите што ги даваше Владата за електричната енергија е логичен след затоа што, како што рече, оваа година, по завршувањето на грејната сезона немаме потреба од ТЕЦ „Неготино“ и големите набавки завршија. Воедно, посочи тој, имаме и постабилна и попредвидлива состојба со цените на електричната енергија на берза.