ЕСМ треба да се вклучи активно и да ја откупува нивната произведена електрична енергија за да заштеди вода и јаглен и тоа да го искористиме во периодите кога ќе биде извесно дека цените на електрична енергија и природен гас ќе растат, вели претседателот на РКЕ
Јас сум против сега да има зголемување на цената на електричната енергија, изјави вечерва во емисијата „Топ тема“ на Телма, претседателот на Регулаторната комисија за енергетика (РКЕ), Марко Бислимоски.
Тој рече дека не би можел да каже колку ќе биде цената на струјата зашто тоа, напомена, е одлука на менаџментот на ЕСМ и на Владата.
Според Бислимоски, ЕСМ треба да ја откупува произведената електрична енергија од новите фотоволтаици и да го подобри производството од своите електрани како лани, а следниот чекор што мора да го направи е да биде многу поактивна на пазарот на мало.
„Јас сум противник сега да има зголемување на цената на електричната енергија зашто се изградија многу фотоволтаици во државата. Од 1 јануари минатата година досега има нови 256 мегавати обновливи изори приклучени на мрежа од кои 205-206 се фотоволтаици кои треба да ги искористиме. Во ред е да заработуваат, но ЕСМ треба да се вклучи активно и да ја откупува нивната произведена електрична енергија за да заштеди вода и јаглен и тоа да го искористиме во периодите кога ќе биде извесно дека цените на електрична енергија и природен гас ќе растат. Претпоставувам дека менаџментот на ЕСМ и Владата прават анализи и калкулации, но не треба да има драстични пореметувања на цената на електричната енергија. Воведовме сериозна реформа во однос на тарифните блокови и тој тренд што го имаме треба да го искористиме. Испративме сигнал да се штеди со цел да обезбедиме и ЕСМ да произведува, но да има можност и да биде многу поактивен на пазарот на електрична енергија. Ние ќе испратиме сигнал и со воведувањето евитна тарифа, и до ЕСМ и до ЕВН Хоум – купувајте електрична енергија кога е најевтина“,
рече Бислимоски.
Тој смета дека е прерано ДДВ-то за струјата на домаќинствата да се врати од 10 на 18 проценти.
„ДДВ-то од 10 отсто треба да остане барем до крајот на годината, па дури потоа да се разгледуваат можностите за негово враќање“,
нагласи претседателот на РКЕ.
Според него, блок тарифите засега дадоа добри резултати и има сериозно намалување на потрошувачката на струја.