Претседателот на Регулаторната комисија за енергетика (РКЕ), Марко Бислимоски, сè уште се консултира со своите адвокати дали да поднесе приватна тужба против лицето кое физички го нападна во вторникот вечерта во угостителски објект во Скопје.
„Напаѓачот не ми се извини мене и воопшто не е битно дали ќе ми се извини или не. Треба да ѝ се извини на институцијата, бидејќи јас ја претставувам институцијата. Марко е денес, утре ќе биде Петко, Станко, сите во оваа држава треба да имаме однос кон институциите, бидејќи тие ја чинат државата. Интересот на државата е секогаш најбитен и ќе остане вечно“,
рече Бислимоски.
Претседателот на РКЕ во вторникот вечерта физички беше нападнат во угостителски објект во централното подрачје на Скопје од Аријанит Џафери, сопственик на фирмата „У пауер“ и син на поранешниот функционер од ДУИ, Муса Џафери, поради постапката за одземање на лиценцата на фирмата за продажба на електрична енергија.