Според последните информации, осомничените терористи биле татко и син. 50-годишниот татко загинал на лице место, додека пак 24-годишниот син е во стабилна состојба во болница
Вкупниот број на жртви од терористичкиот напад на познатата плажа Бонди во Сиднеј, Австралија се искачи на 16, соопшти министерот за здравство на Нов Јужен Велс, Рајан Парк. Во изјава за телевизијата Еј-Би-Си тој рече оти меѓу загинатите има и 12-годишно дете, како и рабин кој бил организатор на настанот „Ханука покрај море“ врз кој беше извршен терористичкиот напад. Дополнително, беше потврдено оти меѓу жртвите е и еден од двајцата напаѓачи, а началникот на полицијата на Нов Јужен Велс, Мал Лањон изјави оти напаѓачите биле татко и син. Таткото, бил неутрализиран од полицијата на местото на настанот, додека пак 24-годишниот син е во стабилна состојба во болница.
Масовното пукање на познатата плажа Бонди во Сиднеј, Австралија е прогласено за терористички инцидент од страна на полицискиот комесар на Нов Јужен Велс, Мал Лањон. Нападот, според официјалните податоци, бил намерно насочен кон еврејската заедница за време на прославата на празникот Ханука. Согласно последните информации, загинаа најмалку 12 лица, додека 29 други се повредени.
Комесарот на полицијата, Лањон потврди дека биле пронајдени импровизирани експлозивни направи во возило поврзано со убиениот напаѓач, што е еден од факторите за прогласување на настанот за терористички. Австралискиот премиер Ентони Албанезе и премиерот на Нов Јужен Велс, Крис Минс, го осудија нападот како чин на злобен антисемитизам. Албанезе рече оти нападот е шок за Австралија и еврејската заедница и вети поддршка за семејствата на жртвите.