„Кога процесите се дигитални, трагата е видлива, а одговорноста е јасна. Кога системите се поврзани, нема простор за злоупотреби, селективност или привилегии“, кажа премиерот во своето обраќање на настанот
Нашата цел е јасна – паметна, дигитална и правична Македонија до 2030 година. Македонија што гледа напред, што инвестира во знаење, технологија и луѓе. Македонија што гради иднина, а не ја чека, порача премиерот Христијан Мицкоски во своето обраќање на денешниот настанот по повод промоцијата на Националната стратегија за развој на информатичко-комуникациски технологии – СМАРТ/МК 2030.
Како што нагласи, Владата што ја предводи дигитализацијата ја поставила како еден од нејзините клучни стратегиски приоритети бидејќи, како што кажа, дигиталната држава е предуслов за владеење на правото и ефикасна борба против корупцијата.
„Кога процесите се дигитални, трагата е видлива, а одговорноста е јасна. Кога системите се поврзани, нема простор за злоупотреби, селективност или привилегии“,
рече премиерот.
Според него, стратегијата СМАРТ/МК 2030 претставува детален и реален патоказ за надминување на, како што кажа, развојните предизвици во областа на информатичко-комуникациските технологии и обезбедување забрзан дигитален развој во сите сектори – од јавната администрација, преку образованието и здравството, до економијата и локалниот развој.
Документот, додаде тој, се темели на принципите и насоките утврдени во Патоказот за дигитална трансформација и е целосно усогласен со Националната развојна стратегија 2024 – 2044, каде што, како што посочи, развојот на човечкиот капитал и дигитализацијата на општеството се препознаени како централни двигатели на напредокот.
„Нема силна економија без дигитални вештини. Нема современо општество без дигитално писмени граѓани. И нема конкурентна држава без иновативен ИКТ-сектор“,
кажа Мицкоски.
Посебна вредност на стратегијата, рече тој, е тоа што таа прецизно ги адресира и краткорочните и среднорочните приоритети утврдени во Националната програма на правото на Европската Унија (ЕУ).
Наведувајќи дека стратегиите сами по себе не се доволни, премиерот кажа дека нивна обврска е визијата да ја претворат во конкретни политики кои ќе резултираат со мерливи и реални промени во секојдневниот живот на граѓаните.
Министерот за дигитална трансформација Стефан Андоновски во изјава за медиумите пред почетокот на настанот рече дека документот треба да ја позиционира земјата меѓу напредните држави преку модернизација на јавните услуги, поддршка на иновациите и создавање услови за нови инвестиции.
Андоновски изјави дека досегашните резултати покажуваат сериозен напредок, но и дека претстои уште многу работа за да се достигне целосниот потенцијал.
Во таа насока, тој кажа дека Македонија бележи значителен скок во глобалните мерења на дигиталниот индекс.
„На минатото мерење, во 2023 година, сме биле во Б категоријата на држави од 85. до 120., 130. место во светот. Годинава имаме раст од 22 позиции и сме на 79. место и се вбројуваме во групата на напредни држави кои имаат дигитална трансформација. На наше ниво, сличен индекс имаат Литванија, Латвија, Нов Зеланд, Малта, така што има сериозен напредок за година и пол – две. Секако постои уште многу простор за напредок. Јас со 79. место не можам да бидам задоволен, но тоа ни е добар поттик дека со работа овие две години имаме сериозен скок“,
рече министерот.
Одговарајќи на новинарско прашање за приоритетите во имплементацијата на стратегијата, Андоновски рече дека фокусот ќе биде ставен на дигитализација на јавните услуги и поддршка на иновациите.
„Првиот столб е инфраструктурата, тоа ќе биде и првиот панел; вториот панел се дигиталните вештини, важноста на дигиталните вештини за нашите граѓани, со таргет до 2030 година најмалку половина од населението да има дигитални вештини на средно ниво, потоа имаме дигиталното управување или услугите, нешто на што веќе работиме, и секако четвртиот дел е вештачката интелигенција, новите технологии и улогата на бизнис-средината и како да поттикнеме иновација во бизнис-секторот“,
рече министерот.
Целта, како што додаде, е граѓаните да имаат побрзи и поефикасни услуги, а компаниите да добијат подобри услови за развој и иновации.