Телефонскиот разговор кој по завршувањето на изборите го оствариле лидерот на ДУИ Али Ахмети и лидерот на БЕСА Билал Касами, инаку дел од коалицијата на СДСМ, бил во рамките на „комуникација помеѓу двајца партиски лидери“, велат од БЕСА за „360 степени“.
„Разговорот беше во рамките на комуникацијата помеѓу двајца партиски лидери, за да си честитаме на завршувањето на еден изборен процес кој ги рефлектира мандатите на партиите согласно одлуката на граѓаните. Чекаме официјализирање на резултатите и потоа ќе разговараме за можните комбинации во Влада“,
велат од „Беса“ за „360 степени“.
Дека Ахмети разговарал со Касами, прв објави лидерот на ДУИ. И тоа дека разговарал не само со Касами туку и со првиот човек на ДПА Мендух Тачи и дека планира да се слушне и со Села, Гаши и Мемеди.
Јавната објава за телефонските разговори со лидерите на партиите на Албанците во Македонија Ахмети ја соопшти со фотографија од декември 2016 година кога на средба во Тирана со помош на премиерот на Албанија Еди Рама, беше донесена платформата на политичките партии на Албанците во Македонија. На документот, кој беше објавен во јавноста на Божиќ, 7 јануари 2017 година, се потпишаа ДУИ, коалицијата Преродба со БЕСА и Алијансата за Албанците.
Своето кусо обраќање на Фејсбук, пред да почнат пост-изборните преговори и коалиции, Ахмети го заврши со зборовите – „Заедно сме посилни“.