На чело на колоната студентите носеа транспарент на кој пишуваше „Некои нови деца, Белград – Нови Сад“, со срце меѓу имињата на двата града и знамето на Универзитетот
По два дена пешачење белградските студенти вечерав пристигнаа во Нови Сад, каде на улиците беа пречекани од илјадници граѓани со аплаузи и овации, пренесува регионалниот сервис на Радио Слободна Европа.
Студентите беа пречекани со црвен килим на мостот „Дуга“ од нивните колеги од Нови Сад, со кои си разменија знамиња на двата града и знамињата на универзитетите во Белград и Нови Сад.
Оттаму тие заедно пешачеа низ централните градски улици до Железничката станица, каде што со петнаесетминутно молчење им оддадоа почит на загинатите во уривањето на настрешницата.
Студентите од Белград на 30 декември претпладне тргнаа пеш кон Нови Сад за да им се придружат на своите колеги во блокирањето на три моста на реката Дунав на 1 февруари.
На овој начин ќе одбележат три месеци од загинувањето на 15 лица при уривањето на реконструираната бетонска настрешница на Железничката станица во Нови Сад што се случи на 1 ноември.
Десетици илјади граѓани направија шпалир по целиот центар на Нови Сад каде поминуваа студентите.
Со аплаузи, огномети и конфети, прегратки и солзи, граѓаните фрлаа цвеќиња пред учениците и им закачуваа медали на врат.
Тие ги пречекаа со транспарент „Па каде сте белграѓани“, а ги носеа и пораките „Не сте сами“, „Студенти, добредојдовте“ и „Вие сте љубов, вера и надеж“.
На чело на колоната студентите носеа транспарент на кој пишуваше „Некои нови деца, Белград – Нови Сад“ со срце меѓу имињата на двата града и знамето на Универзитетот.
Студентските редари од Белград носеа венци со имињата на петнаесеттмина загинати во уривањето на настрешницата што ги положија пред Железничката станица.
Откако им оддадоа почит на жртвите, белградските студенти се упатија кон новосадските факултети каде што ќе преноќат.
Студентите од Нови Сад им подготвија храна и места за спиење на колегите од Белград во салите на факулетот кое се во блокада.
Група студенти кои тргнаа од Белград со велосипеди претходно пристигнаа во Нови Сад, а пред Железничката станица ги пречекаа новосадски велосипедисти.
Студентите кои пеш пристигнаа во Нови Сад, претходната ноќ ја поминаа на отворено во Инџија, на околу 40 километри од Белград, а денеска наутро го продолжија маршот.
Паузираа во неколку градови, каде мештаните ги пречекуваа со освежување и храна.
Трасата на маршот ја обезбедуваа студентски редари и полицијат, а конвојот беше придружуван од возило на Итна помош и цистерна со питка вода.
Стотици велосипедисти претходно возеа низ Нови Сад за поддршка на студентските протести и за добредојде на студентите од Белград.
Несреќата во Нови Сад предизвика бран масовни протести ширум Србија, носејќи десетици илјади луѓе на улиците.
Изминативе два месеци протестите ги предводеа студентите кои блокираа десетици државни универзитети, а клучното барање е да се утврди кривичната и политичката одговорност на властите за несреќата во Нови Сад.
Владата на чело со српскиот претседател Александар Вучиќ тврди дека барањата на студентите се исполнети.
Студентите, пак, му порачаа дека Вучиќ дека не е одговорен за исполнување на нивните барања и оти тие не се исполнети поради што ќе продолжат со протестите.
По уривањето на настрешницата на Железниката станица во Нови Сад студентите изнесоа четири барања.
Првото е да се објави комплетна документација за реконструкцијата на Железничката станица, за да се утврди одговорноста за несреќата.
Второто барање на студентите е напаѓачите на демонстрантите на протестите, кои уследија по трагедијата во Нови Сад низ Србија, да бидат идентификувани и кривично гонети.
Тие бараат и ослободување на уапсените активисти на протестите и запирање на кривичната постапка против нив.
Четвртото барање е зголемување на буџетот за високото образование за 20 отсто.