Организаторите во пресрет на протестот рекоа дека се свесни оти поради сезоната на одмори на овој протест нема да има толку луѓе како на минатите, но сакаат да го „одржат пламенот“ до крајот на август кога сметаат дека демонстрациите повторно ќе станат масовни
По масовните убиства во Основното училиште „Владислав Рибникар“ во Белград и во Младеновац, во Белград вечерва се одржа 13. по ред протест под слоганот „Србија против насилството“.
Поради топлото време, собирот започна после 20 часот пред зградата на српскиот парламент од каде демонстрантите тргнаа на марш и околу 21 часот стигнаа до Републичкото јавно обвинителство.
Обвинителството беше избрано за крајна дестинација на вечерашниот протест бидејќи организаторите и дел од јавноста е револтиран што врховната јавна обвинителка Загорка Доловац сите изминати години молчеше за клучните афери на власта на Александар Вучиќ.
Организаторите во пресрет на протестот рекоа дека се свесни оти поради сезоната на одмори на овој протест нема да има толку луѓе како на минатите, но сакаат да го „одржат пламенот“ до крајот на август кога сметаат дека демонстрациите повторно ќе станат масовни.
Денеска присутните, на маршот кон обвинителството, поминаа и покрај зградата на Владата каде скандираа „Нè има доволно“.
Покрај во Белград, вечерва протест се одржа и во Краљево, а синоќа демонстранти маршираа и во Нови Сад, Јагодина, Богатиќ, Крагуевац и Врање, додека во Ниш наместо прошетка се одржа перформанс пред градското собрание.