Институтот за јавно здравје на Белгија соопшти дека вчера е надминат рекордот на дневно новозаразени со коронавирус од март, јави МИА од Брисел.
Со 689 новозаразени во вчера, вториот бран на новиот коронавирус го надмина првиот од 28 март, кога беа регистрирани 629 новозаразени, соопшти Институтот за јавно здравје.
Како што објавуваат медиумите во Белгија денеска, отежнувачка околност е што овој пик, според сите проекции, не е плафонот, како што беше оној од 629 во март, и дека бројката најверојатно ќе продолжи да расте.
Европскиот центар за спречување болести вчера ја рангираше Белгија прва по стапката на заразени на 100 000 жители во Европската Унија, со што земјата го собори рекордот на Чешка.
Се очекува до утре да се надмине прагот на 700 новозаразени на ден.