Националниот совет за безбедност на Белгија одлучи дополнително олабавување на рестрикциите поврзани за здравствената криза, но власта потсетува дека непочитувањето на основните мерки може да доведе до повторно воведување на старите правила, јави МИА од Брисел.
Носењето маска нема да биде задолжително и покрај препораките на дел од експертите, иако секоја компанија или установа може да го побара задолжителна маска, како што веќе е случај со некои супермаркети и настани.
Се отвораат и базените, фитнес-центрите, театрите, парковите, киносалите, и салите за приеми, но не се дозволува присуство на повеќе од 50 лица, задолжително е почитување на здравствените протоколи, одржување дистанца и се препорачува носење на маска. Дискотеките и масовните собири остануваат забранети, а власта вети поддршка за овој сектор.
Културата, која е една од најтешко погодените области, ќе може да прима публика од 1 јули под услов да се почитуваат протоколите. Бројот на присутни не смее да надмине 200 во затворен простор, и 400 на отворено. Се отвораат и пазарите.
Националниот белгиски празник, што се одржува на 21 јули, оваа година ќе им биде посветен на жртвите на коронавирусот, а традиционалната воена парада пред кралската палата е откажана, и ќе биде заменета со уметнички настапи на повеќе локации во земјата.