Републиканскиот претседателски кандидат Доналд Трамп бил информиран од разузнавачките служби за наводните ирански закани за атентат, откри неговата кампања уште во септември
Белата куќа во понеделникот објави дека САД со години внимателно ги следат иранските закани кон поранешниот претседател Доналд Трамп и го предупреди Техеран на последици доколку нападне кој било американски државјанин.
„Сметаме дека ова е прашање на национална и домашна безбедност од највисок приоритет и силно го осудуваме Иран за овие дрски закани. Доколку Иран нападне некој од нашите граѓани, вклучително и оние што продолжуваат да им служат на САД или оние што претходно служеле, Иран ќе се соочи со тешки последици“,
изјави портпаролот на Советот за национална безбедност на Белата куќа, Шон Савет.
Републиканскиот претседателски кандидат Доналд Трамп бил информиран од разузнавачките служби за наводните ирански закани за атентат, откри неговата кампања уште во септември.
„Трамп беше информиран од Канцеларијата на директорот на националното разузнавање за реалните и конкретни закани од Иран дека ќе го убие во обид да се дестабилизира и да сее хаос во САД“,
соопштија од кампањата.
Помошниците на Трамп рекоа дека разузнавачките службеници идентификувале дека иранските закани „се зголемиле во текот на изминатите неколку месеци“ и дека претставниците на американската влада работат на заштита на поранешниот американски претседател.
Трамп потоа објави на својата социјална мрежа Трут дека има големи закани по неговиот живот од Иран и додаде дека тие не успеале, но дека ќе се обиде повторно.
Пакистанец со наводни врски со Иран претходно во септември се изјасни за невин за обвиненијата кои произлегуваат од наводниот заговор за атентат на американски политичар како одмазда за американското убиство на иранскиот воен командант Касем Сулејмани во 2020 година.
Федералните власти одделно го истражуваат наводниот обид за атентат врз Трамп на неговиот терен за голф во Флорида во средината на септември и пукањето во него на 13 јули на предизборен митинг во Пенсилванија. Нема индикации за иранска вмешаност во ништо од ова.
Во август, САД го обвинија Иран дека започнал сајбер операции против кампањите на двајцата претседателски кандидати на САД. Техеран ги отфрли обвинувањата.