На новинарско прашање дали актуелниот 81-годишен претседател на САД има намера да се пензионира, портпаролката на Белата куќа одговори: „Апсолутно не“
Американскиот претседател Џо Бајден апсолутно не размислува за повлекување од трката за втор мандат, изјави портпаролката на Белата куќа, Карин Жан-Пјер, откако прашањата во врска со неговата состојба почнаа да се интензивираат по неодамнешната дебата со неговиот противкандидат Доналд Трамп.
„Демократот Бајден продолжува со кампањата. Останува во трката“,
рече Карин Жан-Пјер во изјавата за новинарите.
На новинарско прашање дали актуелниот 81-годишен претседател има намера да се пензионира, портпаролката на Белата куќа одговори: „Апсолутно не“.
„Тој разбира дека е легитимно луѓето да го поставуваат тоа прашање, но неговите резултати не смеат да се заборават“,
додаде Жан-Пјер.
Неодамнешниот телевизиски дуел на Бајден со републиканскиот ривал Доналд Трамп предизвика бран на паника меѓу демократите дека американскиот претседател не е способен за втор мандат.
Во меѓувреме, американски медиуми, повикувајќи се на извори од кампањата на Бајден, Белата куќа и Демократскиот национален комитет, објавија дека потпретседателката на САД, Камала Харис, е првата алтернатива за замена на американскиот претседател Џо Бајден доколку тој одлучи да ја прекине кампањата за негов реизбор.
Харис, пак, ја отфрли идејата дека актуелниот американски претседател треба да се повлече од изборната трка. Рече дека е горда што е потпретседателка на Џо Бајден и одби директно да одговори дали е подготвена да ја води земјата доколку е потребно.