Според Бектеши, Министерството за економија го прифатило извештајот на Пазарниот инспекторат и по завршувањето на анализата не ја исклучува можноста неговиот ресор да ѝ предложи на Владата укинување на мерката за субвенционирање на електрична енергија за фирмите од прехранбениот сектор
Министерот за економија Крешник Бектеши во вечерашното гостување во емисијата „Економски магазин“ на ТВ Алсат рече дека Министерството со кое раководи најверојатно ќе ѝ предложи на Владата укинување на мерките за помош на фирмите кои не се придржувале до договорот за намалување на цените на основните прехранбени производи.
Имено, мерките предвидуваа фирмите од прехранбениот сектор да плаќаат струја по повластена цена, односно да добиваат субвенции од Владата, но со услов да ги намалат цените на основните прехранбени производи.
Како што истакна министерот вечерва, голем број компании го прекршиле договорот и не ги намалиле цените.
Според Бектеши, Министерството за економија го прифатило извештајот на Пазарниот инспекторат и по завршувањето на анализата не ја исклучува можноста неговиот ресор да ѝ предложи на Владата укинување на мерката за субвенционирање на електрична енергија за фирмите од прехранбениот сектор.
„Имавме повеќе средби со стопанските комори, особено со секторите кои се занимаваат со производство на основни производи, каде сите дојдовме до заклучок дека Владата треба да преземе соодветни мерки за да им помогне на производителите со електрична енергија за да ги намалат цените на производите кои се нагласени во владината одлука, како што се леб, масло, тестенини и млеко, особено за деца. Значителен дел од локалните компании, за жал, не го испочитуваа џентлменскиот договор што го постигнавме меѓу Владата и Стопанските комори“,
изјави Бектеши.
Конечниот извештај по анализите на извештајот на Пазарниот инспекторат, според министерот за економија треба да биде готов до крајот на овој месец.
Сепак, прелимираните податоци, посочи тој, покажуваат дека значителен дел од компаниите кои ја искористиле мерката за субвенционирана електрична енергија не го испочитувале договореното.
Би рекол дека над 60, некаде и до 70 отсто, не ја почитувале одлуката и ги задржале истите цени, во однос на месецот ноември, пред да стапи на сила одлуката за субвенционирање на електрична енергија. Затоа Министерството за економија ќе и предложи на Владата да донесеме одлука за укинување на оваа мерка“, рече Бектеши.
Средствата за фирмите, како што посочи тој, ќе бидат пренаменети за помош на загрозените категории граѓани.
„Мерката за основните и средните училишта ќе остане, тоа сме го ветиле. За јавните комунални претпријатија ќе остане до крајот на завршување на кризната состојба. За фирмите, предлогот на Министерството за економија до Владата ќе биде да се укине и тие средства да се користат за мерки за поддршка кон граѓаните, посебно за тие што немаат големи приходи“,
рече Бектеши.
Ваквата можност Бектеши ја најави уште на 10 февруари на брифинг со новинарите, прашан да даде објаснување зошто во прехранбениот сектор не им се укинува повластената цена на електрична енергија, со оглед на тоа што само два или три производи се намалени во маркетите.
„Би требало кон крајот на овој месец да имаме конечен извештај од Државниот пазарен инспекторат и согласно тој извештај ќе се донесат одредени одлуки. Согласно прогласената кризна состојба, одлуките може да бидат и селективни, па може за тие компании кои не ги намалиле цените да не важи веќе оваа мерка, а за тие што ги имаат намалено и навистина се потрудиле да направат максимални напори за да им излезат во пресрет на граѓаните – за нив да продолжи до крајот на април“,
рече тогаш министерот за економија.