Разговараме заедно со стопанските комори и со сите други засегнати страни и најверојатно до крајот на месецот јавноста ќе биде известена во делот на тоа како би изгледале сите антикризни мерки до крајот на оваа година, вели министерот
До крајот на овој месец би требало да бидат дефинирани дополнителните антикризни мерки кои може да се очекуваат веќе од ноември и кои ќе важат до крајот на годината. Кои мерки ќе се донесат, ќе биде договорено во рамки на разговорите, заедно со стопанските комори и со сите останати засегнати страни, вели министерот за економија Крешник Бектеши.
„Министерствата за финансии, за труд и социјална политика, за економија, како и кабинетот на премиерот и на вицепремиерот за економски прашања работат и пред крај се нацрт-верзиите. Разговараме заедно со стопанските комори и со сите други засегнати страни и најверојатно до крајот на месецот јавноста ќе биде известена во делот на тоа како би изгледале сите антикризни мерки до крајот на оваа година. Јас секогаш се обидувам да бидам многу внимателен, не сакам лично на тие луѓе што се експерти, што работат таму, да им влијаам на тоа како мислам дека би требало да изгледаат мерките“,
рече денеска Бектеши одговарајќи на новинарски прашања при посетата на компанијата „Глобус“.
Бектеши нагласи дека Владата има воспоставено принцип на јавно-приватни разговори со сите засегнати страни, со стопанските комори и со синдикатите и оти мерките во рамки на буџетските можности се прават согласно анализите, предлозите, нивните сугестии и потребите.
„Моја желба би можела да биде да земат што повеќе луѓе, но согласно можностите кои се и предлозите на стопанските комори и синдикатите во таа насока ќе се носат мерките. Јас знам предлози, а за конкретни мерки, за тоа ќе одлучат Владата и министерствата, секако во рамки на нивните сектори“,
додаде Бектеши.
На прашањето дали можеби ќе има некаква прераспределба на буџетските средства за реализација на дополнителните антикризни мерки, тој потсети дека антикризните мерки ќе се реализираат со средства од програмата П1.
„Колку што знам, а и вие треба да знаете, распределбата на Буџетот помина во Собранието и веќе имаме Буџет кој е во сила и кој не може да се менува. Во делот на П1-програмата има предвидено одредени средства за реализација на антикризните мерки и во рамки на тие средства се реализираат антикризните мерки. Буџетот моментално не може да се менува, бидејќи треба да се менува во Собрание“,
објасни Бектеши.
Министерот денеска ги пофали домашните производители „кои доброволно, во одредени моменти, ги намалуваат цените“.
Според министерот, сите податоци покажуваат дека цените во малопродажбата се намалуваат, особено оние опфатени со владината одлука, а има податоци и дека се намалуваат цени и од другите категории производи.
Затоа тој е убеден дека до крајот на годината инфлацијата, не само кај храната, ќе се намали на пет отсто.