Комплетноста ја потврдува Управата за јавни приходи, во рок од три дена од денот на доставувањето на барањето
Работодавачите до 30 април можат преку системот Е-даноци на УЈП да го поднесат барањето за финансиска поддршка за исплата на плати на работниците за февруари и март.
Ова барање како „образец БФП-ИП/3“ веќе е поставено на платформата (https://etax-fl.ujp.gov.mk/), а комплетноста ја потврдува Управата за јавни приходи, во рок од три дена од денот на доставувањето на барањето.
За остварување на правото, работодавачот поднесува барање за финансиска поддршка за исплата на платите на работниците (образец БФП-ИП/3) за секој месец поединечно до Управата за јавни приходи, врз основа на Законот за финансиска поддршка на работодавачите погодени од здравствено-економската криза предизвикана од вирусот ковид-19, заради исплата на платите за февруари и март 2021 година („Службен весник на РСМ“, бр. 85/2021).
Начинот на пополнување на барањето за финансиска поддршка за исплата на плати за февруари и март 2021 година (образец БФП-ИП/3) е составен дел на барањето, односно е појаснет во Упатството за пополнување, прецизираат од УЈП.