Бајден доаѓа во Европа откако украинскиот претседател Володимир Зеленски ги обиколи западните престолнини за да го претстави својот план да ја победи Русија, која ја нападна неговата земја во февруари 2022 година
Американскиот претседател Џо Бајден ќе престојува во кратка посета на Берлин за да разговара со германските, француските и британските лидери за војната во Украина и за ескалацијата на конфликтот на Блискиот Исток што може да прерасне во отворена војна меѓу Израел и Иран.
Бајден првично требаше да одржи поширок состанок со земјите кои воено ѝ помагаат на Украина во американската воздухопловна база во Рамштајн, Германија минатата недела, за време на планираната тридневна посета на земјата, прва по речиси 40 години. Но, тој го откажа патувањето поради ураганот Милтон на Флорида.
Бајден денеска доцна ќе слета во Берлин, а утре претпладне ќе има билатерални разговори со германскиот претседател Франк Валтер Штајнмаер и со канцеларот Олаф Шолц, пред планираната средба со европските лидери попладне.
Бајден доаѓа во Европа откако украинскиот претседател Володимир Зеленски ги обиколи западните престолнини за да го претстави својот план да ја победи Русија, која ја нападна неговата земја во февруари 2022 година.
„Темите на разговор ќе бидат ситуацијата на бојното поле во Украина, развојот на војната, како сојузниците најдобро да ѝ помогнат на Украина“,
изјави висок американски функционер пред посетата.
Важна тема ќе биде војната меѓу Израел и Хамас во Појасот Газа и Хезболах во Либан, која може да се претвори во отворена војна со Иран.
Соединетите Држави и Германија се блиски сојузници на Израел, кој станува сè поизолиран поради неговата воена кампања во палестинската енклава Газа.
„Нема да прифатиме Иран да го нападне Израел со проектили. Тоа не смее да се случи. Не смее да има понатамошна дестабилизација на регионот. И Иран си игра со оган. Тоа мора да престане“,
изјави вчера германскиот канцелар Олаф Шолц.