Одличјето за најдобар филм го презеде брачната двојка Ема Томас и Кристофер Нолан (режисер), кои заедно со Чарлс Ровен беа продуценти, а ирскиот глумец Килијан Марфи го понесе признанието за најдобар глумец за улогата на Џеј Роберт Опенхајмер – американски теоретски физичар кој се смета за таткото на атомските бомби
Филмот „Опенхајмер“ е најголемиот хит годинава на доделувањето на 77. филмски награди БАФТА во Лондон, Велика Британија, победувајќи во седум категории, меѓу кои и за најдобар филм, за најдобра машка главна улога и за најдобар режисер.
Одличјето за најдобар филм го презеде брачната двојка Ема Томас и Кристофер Нолан (режисер), кои заедно со Чарлс Ровен беа и продуценти, а ирскиот глумец Килијан Марфи го понесе признанието за најдобар глумец за улогата на Џеј Роберт Опенхајмер – американски теоретски физичар кој се смета за таткото на атомските бомби.
„Женската верзија“ на приказната за Франкенштајн и чудовиштето, филмот „Бедни суштества“ (Poor Things) на Јоргос Лантимос освои пет статуетки вклучувајќи ја и онаа за најдобра женска улога, којашто ѝ припадна на Ема Стоун.
Филмот „Барби“ остана без ниту една награда, и покрај тоа што имаше номинации во пет категории.
Признанието „Ѕвезда во подем“, единствената награда БАФТА за којашто одлучува јавноста со свој глас, ѝ припадна на англиската глумица Мија Мекен-Брус. Наградата за најдобар документарен филм ја доби филмот „20 дена во Мариупол“ на Мстислав Чернов.
Германската драма „Зона на интерес“ на Џонатан Глејзер освои три награди БАФТА, меѓу кои и за најдобар британски филм и за најдобар странски филм.
Стипендијата БАФТА наменета за заслуги и извонредни филмски остварувања, што во минатото, меѓу другите, ја добиваа Стивен Спилберг, Хелен Мирен и Чарли Чаплин, годинава ѝ беше доделена на британската глумица Саманта Мортон.
Домаќин на свеченото доделување на престижните награди беше шкотскиот глумец Дејвид Тенант.
Најголем број номинации на овогодинешните награди БАФТА доби филмот „Опенхајмер“ на Кристофер Нолан, дури 13. „Бедни суштества“ доби 11 номинации, „Убијци на цветната месечина“ (Killers of the Flower Moon) на Мартин Скорсезе и „Зона на интерес“ имаа по девет номинации.
Британската академија за филмска и телевизиска уметност – БАФТА е независна организација основана 1947 година од група британски филмски продуценти. Целта на наградите е поттик, развој и оддавање признанија за најдобрите филмови, ТВ-серии улоги и други уметнички остварувања во тоа поле.