Далекусежната царинска офанзива на американскиот претседател Доналд Трамп која втор ден се рефлектира на движењата на пазарите, се помалку дава надеж кај инвеститорите дека економската стабилност би можела да се врати пред крајот на оваа недела
Азиските берзи втор ден бележат пад откако американскиот претседател Доналд Трамп ги објави новите царини за околу 180 земји кои извезуваат производи во Соединетите Американски Држави што предизвика загрижност за глобалната трговска стабилност, објави Би-би-си.
Денеска, референтната јапонска берза Nikkei 225 падна за дополнителни 3,5 проценти, австралиската ASX 200 за повеќе од два проценти, а индексот на сингапурската Straits Times е понизок за речиси три проценти.
Акциите на јужнокорејските берзи, исто така, го губат тлото, но претпоставките на аналитичарите се дека тоа може да е повразно и со случувањата во земјата откако уставниот суд го потврди импичментот на претседателот Јун Сук Јеол.
Во меѓувреме берзите во Кина, Хонг Конг и Тајван се затворени поради државни празници.
Далекусежната царинска офанзива на американскиот претседател Доналд Трамп која втор ден се рефлектира на движењата на пазарите, се помалку дава надеж кај инвеститорите дека економската стабилност би можела да се врати пред крајот на оваа недела.
Објавата на американскиот претседател на нови царини од најмалку 10 отсто на речиси целиот увоз, од кои не се исклучени ниту најголемите и традиционални трговски партнери на САД уште вчера предизвикаа шокови на глобалните пазари.
По објавата на новите царини со кои американскиот претседател, како што наведува Би-би-си, сака да го промени светскиот економски поредок, Вол Стрит ја забележа најголемата еднодневна загуба од јуни 2020 година.
Според прелиминарните податоци, индексот S&P 500 загуби 4,85 отсто од вредноста, додека Nasdaq падна за 5,99 отсто, а Dow Jones за 3,98 отсто.
Акциите на технолошките компании кои беа во пораст претрпеа голем пад откако го туркаа Вол Стрит до рекордни височини во последните неколку години.
Американските акции бележат пад откако Трамп ја презеде функцијата во јануари, при што S&P 500 и Nasdaq веќе паднаа за 10 отсто од неодамнешните рекордни максимални вредности, влегувајќи во таканаречена корекција бидејќи инвеститорите ја земаа предвид економската штета од царините.
Сепак, нивото на царините што Трамп го објави во средата навечер ги надмина очекувањата, па веднаш по неговата објава почна дополнителен пад.
Кај трговците ги зголемуваат очекувањата дека Банката на федерални резерви ќе ги намали каматните стапки четири пати оваа година, почнувајќи со намалување за четвртина поен во јуни.
Голем пад доживеаја и компаниите кои продаваат чевли и облека, откако Трамп воведе големи царини за земјите со големо производство, како Виетнам, Индонезија и Кина.
Загуби забележаа и големите банки како што се „Сити груп“ (Citigroup), „Банк оф Америка“ (Bank of America) и Џеј-Пи Морган Чејс (JPMorgan Chase & Co), бидејќи се чувствителни на економски ризици.