Децата од Пехчево добија новогодишното изненадување од австриските пожарникари, кои изминатото лето учествуваа во гаснењето на пожарите во Малешевијата, јави дописникот на МИА.
Испраќајќи им подароци и пакетчиња, пожарникарите од Австрија на најмалите им ја честитаа Новата година со желби никогаш да не се повтори она што се случи летово кога изгореа илјадници хектари шума во Пехчевско и Беровско.
„Тоа се луѓе со огромни души, луѓе спремни да се жртвуваат, хумани луѓе, херои на денешницата. Со испраќањето на овие подароци пожарникарите покажуваат дека пријателствата кои ги стекнаа ќе траат вечно. Им благодариме за сè“,
вели пехчевецот Александар Бојчевски.
Еден од пожарникарите, Маркус Еберхарт, со фотографија од противпожарно возило преку социјалните мрежи најави поддршка за градот Пехчево.
„Здраво луѓе на Пехчево, ви посакувам Среќна нова година и ви давам мал поглед на она што ќе се случи во 2022 година. Повеќе информации за донацијата ќе соопштиме наскоро“,
истакна Еберхарт.
Австриските пожарникари за време на пожарите летото 2021 година, дојдоа да помогнат во гаснење, а беа стационирани на Градскиот стадион во Пехчево.