Албанезе рече дека добил уверувања од палестинската самоуправа дека терористите на Хамас нема да добијат место во ниедна идна палестинска држава
Австралија, по Франција и Канада, ќе ја признае државата Палестина на Генералното собрание на ОН во септември, објави денеска премиерот Ентони Албанезе.
„Решението со две држави е најдобрата надеж на човештвото за прекинување на циклусот на насилство на Блискиот Исток и за прекин на конфликтот и страдањето во Газа. Австралија ќе го признае правото на палестинскиот народ на сопствена држава. Мирот може да биде само привремен сè додека Израелците и Палестинците не добијат свои држави“,
изјави лидерот на лабуристите пред новинарите во Канбера.
Војната во Појасот Газа, која започна по невидениот напад врз Израел од страна на палестинското исламистичко движење Хамас на 7 октомври 2023 година, ги обнови повиците за признавање на државата Палестина.
Албанезе рече дека добил уверувања од Палестинската самоуправа дека терористите на Хамас нема да добијат место во ниедна идна палестинска држава.
Меѓународниот притисок врз израелската влада за да најде решение за конфликтот што доведе до тешка хуманитарна криза во опколената палестинска енклава, се повеќе расте. Насилството на Западниот Брег, палестинската територија окупирана од Израел од 1967 година, исто така се интензивираше од почетокот на војната во Газа. Кон крајот на јули, францускиот претседател Емануел Макрон ја објави својата намера да ја признае Државата Палестина на 80. сесија на Генералното собрание на Обединетите нации во септември, надевајќи се дека ќе создаде колективен моментум во таа насока.
Одлука што го наградува теророт, рече тогаш израелскиот премиер Бенјамин Нетанјаху осврнувајќи се на нападот врз Израел од 7 октомври. САД, главниот поддржувач на Израел, цврсто ја отфрлија оваа, како што ја нарекоа, непромислена мерка.
Неколку дена подоцна, Канада, исто така, ја објави својата намера да поддржи палестинска држава. Обединетото Кралство, исто така, објави дека ќе ја признае Палестина доколку Израел не преземе низа обврски, вклучително и прекин на огнот во Појасот Газа.
Вкупно три четвртини од земјите членки на ОН ја признаваат државата Палестина, која беше прогласена од палестинското раководство во егзил кон крајот на 1980-тите. Овој дипломатски чин го спроведоа десетина земји од почетокот на војната во Газа.
Кон крајот на јули, Австралија и 14 други западни земји, вклучувајќи ги Франција и Канада, ја повикаа меѓународната заедница да признае палестинска држава.
Соседот на Австралија, Нов Зеланд, исто така, објави дека ќе разгледа признавање на државата Палестина до септември. Зборувајќи за тековната хуманитарна катастрофа во Газа, министерот за надворешни работи Винстон Питерс рече:
„Имаме намера да го процениме прашањето (за признавање на државата Палестина) и да дејствуваме во согласност со принципите, вредностите и националните интереси на Нов Зеланд“.
Министерот посочи дека одлуката ќе биде објавена во ОН во септември.