Ѓоковиќ досега одбиваше јавно да зборува за својот вакцинален статус
Австралискиот премиер Скот Морисон изјави денеска дека најдобриот светски тенисер Новак Ѓоковиќ ќе мора да докаже дека медицинската потврда со која е ослободен од обврската за вакцинирање против коронавирус ја добил на автентичен начин, или, во спритвно ќе биде вратен дома со првиот авион.
„Доколку не добиеме доволно докази, кон него ќе се однесуваме како кон кој било друг, односно со првиот авион ќе биде вратен дома. Нема да има никакви посебни правила за Ѓоковиќ“,
изјави Морисон, по средбата со претставници на австралиските сојузни држави, на која било разговарано за рекордните бројки заразени со коронавирус во земјата.
Реакцијата на Морисон следува откако тениската федерација на Австралија и Владата на државата Викторија објавија дека Ѓоковиќ не примал никаков посебен третман за да добие лекарска потврда со која се ослободува од вакцинирање против ковид-19, што е услов за сите тенисери кои ќе настапат на претстојниот грен – слем турнир Австралија Опен. Надлежните рекоа дека Ѓоковиќ бил еден од 26-те тенисери кои побарале и добиле лекарско изземање за вакцинација.
Ѓоковиќ денеска треба да пристигне во Мелбурн во надеж дека на крајот сепак, ќе може да настапи на првиот календарски грен – слем и во случај на триумф да стане апсолутен светски рекордер со 21 титла на големите турнири.
Реакции во врска со проблемот со вакцинацијата на Србинот пристигнаа и од други спортисти, па така Тони Надал, долгогодишниот тренер на Рафаел Надал, вели дека е изненаден од одлуката на Ѓоковиќ да му се дозволи настап.
„Ѓоковиќ има право да ја чува својата медицинска историја во тајност. Верувам дека е свесен дека од коронавирусот починаа шест милиони луѓе и дека ќе ја објасни својата ситуација. Не верувам дека имало какви било нерегуларности, но за да нема контроверзи, мора сите учесници во овој случај да бидат искрени“,
напиша Надал во колумната за весникот „Ел Паис“.
Ѓоковиќ досега одбиваше да зборува за својот вакцинален статус, но во април кажа дека е против вакцинирањето.