Карантинот е клучен елемент во стратегијата на федералната влада за спречување на пандемијата на коронавирус
Границите постепено ќе се отвораат дури кога бројот на вакцинирани ќе се зголеми на 80 проценти
Австралија ќе се придржува до стратегијата за карантин против коронавирусот се додека најмалку 70 проценти од населението не биде целосно вакцинирано, но и потоа ќе мора да почне да живее со вирусот, соопшти денеска премиерот Скот Морисон.
Во земјата вчера е поставен „рекорд“ со 914 нови случаи на коронавирус, што е најголем дневен број на новозаразени, додека јужните и источните држави Нов Јужен Велс, Викторија и главниот град Канбера се под строг карантин, пренесуваат британските медиуми.
„Не можете да живеете во карантин засекогаш, мора да го промените тоа во одреден момент, и тоа се случува кога 70 проценти од населението е вакцинирано“,
рече Морисон во телевизиско интервју.
Карантинот е клучен елемент во стратегијата на федералната влада за спречување на пандемијата на коронавирус. Сега е поставена цел за вакцинација од 70 проценти, а границите постепено ќе се отвораат дури кога бројот на вакцинирани ќе се зголеми на 80 проценти.
„Карантинот не е одржлив начин за решавање на проблемот со вирусот и затоа мора да достигнеме 70 и 80 проценти од вакцинираните, за да можеме да почнеме да живееме со вирусот“,
призна премиерот Морисон.
Во Австралија, која има 25 милиони жители, околу 60 проценти од населението во моментов се наоѓа во карантин.
Австралиските власти соопштија дека уапсиле повеќе од 250 учесници во демонстрациите вчера против рестриктивните мерки воведени поради коронавирусот.
Протести се одржаа во неколку градови, а најголемиот беше во Мелбурн, каде имаше жестоки судири меѓу полицијата и демонстрантите.