Авионот кружеше над Пловдив повеќе од еден час, по што пилотот одлучи да слета без електронски помагала, потпирајќи се на хартиени мапи
Авионот што ја превезуваше претседателката на Европската комисија Урсула фон дер Лајен до Бугарија вчера попладне ја изгуби ГПС-навигацијата и мораше рачно да слета користејќи хартиени мапи. Тројца службеници запознаени со инцидентот изјавија за „Фајненшл тајмс“ дека постои сомневање за руско попречување на сигналот.
„Целата област околу аеродромот остана без ГПС“,
рече еден службеник.
Авионот кружеше над Пловдив повеќе од еден час, по што пилотот одлучи да слета без електронски помагала, потпирајќи се на хартиени мапи.
„Несомнено стануваше збор за пречки“,
додаде истиот извор.
Службата за контрола на воздушниот сообраќај на Бугарија го потврди инцидентот.
„Од февруари 2022 година бележиме значително зголемување на случаите на пречки, а во поново време и лажирање на ГПС-сигналите. Овие пречки го нарушуваат точниот прием на сигналот и предизвикуваат оперативни тешкотии за авионите и копнените системи“,
се вели во соопштението.
Таквото ГПС-блокирање, познато како „џеминг“ и „спуфинг“, традиционално го користат воените и разузнавачките служби за заштита на чувствителни локации. Но, во последниве години европските влади велат дека Русија сè повеќе го користи за нарушување на цивилниот живот.
Се предупредува дека зголемувањето на ваквите напади може да предизвика сериозна воздушна катастрофа со тоа што на комерцијалните авиони им се одзема видливоста. Бројот на случаи на ГПС-блокирање значително се зголеми во балтичките држави и Источна Европа, особено во областите блиску до границите на Русија.
Фон дер Лајен пристигна во Бугарија од Варшава за да се сретне со премиерот Росен Жељазков и за да посети фабрика за муниција. Целта на обиколката на источната граница на ЕУ беше да се разговара за зајакнување на одбранбената подготвеност на блокот по руската агресија во Украина.
„Путин не се променил и нема да се промени. Тој е предатор. Може да биде запрен само со силно одвраќање“,
изјави Фон дер Лајен пред новинарите во Пловдив.
Бугарија е еден од клучните европски добавувачи на воена опрема за Украина од почетокот на војната – прво на советско оружје, а сега на модерна артилерија и муниција од домашно производство. Претседателката на Европската комисија го напушти Пловдив без никакви проблеми по посетата со истиот авион.