Според информациите на Министерството за внатрешни работи, од почетокот на војната во земјава влегле 1 924 украински државјани, а 1 365 ја напуштиле државата
Од почетокот на војната во Украина, според информациите на Министерството за внатрешни работи, во земјава влегле 1 924 украински државјани, а 1 365 ја напуштиле државата, изјави денеска владиниот портпарол Душко Арсовски одговарајќи на новинарско прашање за бројот на бегалци од Украина кои се наоѓаат во нашата држава.
Тој беше дециден дека нема лица кои побарале статус на бегалец и сите кои доаѓаат се сместуваат кај роднини или пријатели.
„Северна Македонија не е на рутата на бегалци од војната во Украина на начин каков што гледавме претходните години во однос на бегалската криза од војната во Сирија. Независно од тоа, Владата презема конкретни чекори и беа задолжени министерствата за труд и социјална политика, за здравство, за финансии, за надворешни и за внатрешни работи да преземат мерки за организирано прифаќање на евентуални бегалци и нивно сместување. Министерството за финансии беше задолжено да обезбеди 120 милиони денари за хотелско сместување и дополнителни услуги за граѓани на Украина кои би дошле во Северна Македонија. Досега според последните информации нема лица кои побарале статус на бегалец. Сите оние кои доаѓаат се сместуваат кај роднини и кај пријатели“,
рече Арсовски.