Градоначалничката ова го кажа на денешниот брифинг со новинарите, на кој информира дека до Основното јавно обвинителство за гонење организиран криминал и корупција е поднесена обемна документација од 3 200 страници поврзана со сомнителните постапки за легализација и изградба на објекти во Чаир, за кои очекува да биде постапено
Градоначалничката на Град Скопје, Данела Арсовска, изјави дека е подготвена да се соочи со чаирскиот градоначалник Висар Ганиу, кој вчера најави дека ќе ја тужи за изнесените наводи во врска со дивоградбите во скопски Чаир и околностите околу нивната легализација.
„Ќе ми биде задоволство да го соочам со сите овие докази, каде било и на која било платформа“,
изјави денеска Арсовска.
Градоначалничката ова го кажа на денешниот брифинг со новинарите на кој информира дека до Основното јавно обвинителство за гонење организиран криминал и корупција (ОЈО ГОКК) е поднесена обемна документација од 3 200 страници поврзана со сомнителните постапки за легализација и изградба на објекти во Чаир.
Рече дека документацијата содржи докази за фалсификати, вклучително и изјави потпишани од лица кои во моментот на наводната изградба на нелегалните објекти биле малолетни.
„Станува збор за згради кои се градат сега, додека зборуваме, без никаква документација, без проект, без статика, без платен денар кон градот. Тоа се огромни објекти кои не можат да се скријат, ниту во џеб да се стават“,
изјави Арсовска, посочувајќи дека станува збор за очигледна операција на перење пари.
Во однос на обвинувањата дека случајот има политичка заднина, таа посочи дека слични кривични пријави биле поднесени и во други општини без притоа да биде полемизирана нивната политичка димензија.
Предупреди дека доколку институциите не постапат по случајот, ќе се создаде опасен преседан.
„Ако нема санкционирање, ако денеска има 50 згради што се градат, утре ќе има уште 50. Таму живеат луѓе, не бројки. И тие луѓе не заслужуваат да живеат во 12-катници без гаранција за нивната безбедност“,
посочи Арсовска.