Од Град Скопје изјавија дека во основниот идеен проект биле истакнати детектираните сериозни пречки за реализација кои „благодарение на посветеноста и работата на градската администрација се надминати и со нивно отстранување се овозможува непречена реализација на овој проект“
Поранешниот градоначалник Шилегов, пак, ѝ порача на Арсовска дека фрлањето прашина во очи „со отстранување на грешките на претходното градско раководство”, не го разбира како ништо друго, освен како очаен обид да се обезбеди алиби за сопствената глупост
Системот за Брз автобуски превоз доби зелено светло од меѓународните партнери, со што започнува неговата реализација во главниот град. По две години отстранување на пречките на проектот предизвикани од претходното градско раководство, градот Скопје конечно ќе добие нов транспортен систем, најавија денеска од Град Скопје.
Оттаму посочуваат дека проектот подразбира изградба на два нови терминали и на транспортни центри, обезбедување непречено сообраќање на автобусите, како и набавка на нови еколошки автобуси кои користат ЦНГ.
„Во основниот идеен проект беа истакнати детектираните сериозни пречки за реализација, кои благодарение на посветеноста и работата на градската администрација се надминати и со нивно отстранување се овозможува непречена реализација на овој проект. Градот Скопје и покрај сите блокади продолжува со заложбите кои ќе им овозможат на граѓаните модерен и навремен јавен градски превоз, надминувајќи ги проблемите со кои се соочува и ЈСП и граѓаните кога станува збор за градскиот превоз. Во нашите искрени заложби за модерен и еколошки градски превоз нема да нè сопрат ниту блокадите во Советот на Град Скопје ниту структурните проблеми со кои се соочува ЈСП, а се наследени од претходните раководства на претпријатието“,
порачаа од Градот.
Новите еколошки автобуси и ревидираниот систем значително ќе го намалат сообраќајниот хаос во главниот град и ќе овозможат јавниот превоз да се одвива непречено, а доцнењето да биде минато, додаваат од Град Скопје.
По ваквата информација, на својот фејсбук-профил се огласи поранешниот градски татко Петре Шилегов, кој на градоначалничката Данела Арсовска ѝ порача дека „на будалите отпосле им текнува“ и дека две години се однесувала како „вошка во перика“.
„Мојот професор Марјановиќ, своевремено велеше: на будалите од после им текнува … После две години однесување како вошка во перика, заради очигледната некомпетентност, немање визија и основно познавање, новото градско раководство се враќа онаму каде што требаше да продолжи пред две години. Реализација на целосно разработен проект со обезбедена финансиска констукција, одобрен од меѓународната и домашна стручна јавност како најоптимално решение за Скопје“,
напиша Шилегов.
Фрлањето прашина во очи „со отстранување на грешките на претходното градско раководство”, додаде тој, не го разбирам како ништо друго, освен како очаен обид да се обезбеди алиби за сопствената глупост.
„Впрочем, две години сме сведоци дека незнаењето го кријат со перманентен конфликт и караници со секого, вклучително и со сопствените директори. Загубените две години (досега ќе беше во полн ек изградбата) и парите кои како камати се платени во меѓувреме, за жал, повторно паѓаат на грбот на Скопјани“,
објави поранешниот градоначалник на Град Скопје на својот фејсбук-профил.
На Фејсбук се огласи и поранешниот шеф на кабинет на Шилегов, Никола Наумоски, нагласувајќи дека Арсовска ништо не сменила од проектот на претходното раководство, туку лажела дека работела две години.
„Данела после две години ги отстранила грешките на претходното градско раководство на БРТ проектот и ќе почне да го гради. Дека ништо не сменила кажува и користењето на промотивните материјали за БРТ. А, дека лаже дека работела две години, говори користењето на грешна драфт мапа со згрешена рута на првата линија. Најбољата менаџерка во Европа“,
напиша Наумоски.