Мицкоски, пак, упати посебна критика кон партиите кои одбиле да учествуваат во обединување на опозицијата, обвинувајќи дека тие одработуваат за СДСМ и дека „се продаваат“ како трет пат и нарекувајќи ги измамници и егзибиционисти
Данела Арсовска, кандидатката за градоначалничка на Скопје зад која застана ВМРО-ДПМНЕ вечерва, заедно со партискиот лидер Христијан Мицкоски, присуствуваше на промоцијата на опозицискиот кандидат за градоначалник на Гази Баба, Бобан Стефковски.
Во своето обраќање пред присутните на собирот, Арсовска, како што пренесе ВМРО-ДПМНЕ, ги посочи проблемите на граѓаните во Гази Баба, како дел од Скопје, како проблемот со чиста вода за пиење во некои делови од општината, немање фекална канализација во одредени делови, како и сообраќајниот метеж, но и огромното загадување, предизвикано од некои капацитети.
„Знам и верувам дека во следните четири години овие проблеми веќе нема да ги има за вас како скопјани. Гарантирам дека сите овие проблеми ќе ги разрешиме во првите две години, а веќе во следните две години ќе настапиме со нови проекти“,
истакна Арсовска.
Таа ја нагласи својата визија за Скопје како град кој ја негува традицијата, а гледа кон иднината, но и како чист еколошки чист, без сообраќаен метеж, но и како поубаво и европско место за живеење.
Мицкоски, пак, на собирот упати посебна критика кон партиите кои одбиле да учествуваат во обединување на опозицијата, обвинувајќи дека тие одработуваат за СДСМ и дека „се продаваат“ како трет пат и нарекувајќи ги измамници и егзибиционисти.
„Ние ја подадовме раката на сите, буквално на сите и се уште стои подадена и вратата не е затворена. Но, за жал, како што беше и за претседателските избори, кога не навредуваа и одлучија да го бојкотираат кандидатот на опозицијата во тој период, како што беа лагите за време на претходните парламентарни избори и повторно ги одржаа во живот и Зоран Заев и СДСМ, така и денеска ја одбија раката подадена од ВМРО-ДПМНЕ, под превезот на т.н. национална политика. Тие истите кои требаше да бидат со нас на раскрсниците и да блокираат за Македонија, протестираа за Палестина. Денеска се продаваат за трет пат. Секој глас денеска кој што ќе биде даден за овие измамници, егзибиционисти кои одлучуваат да одработат за Зоран Заев и за СДСМ е директно глас за Зоран Заев и СДСМ“,
обвини Мицкоски.