Скопската градоначалничка реагираше на изјавата на првиот вицепремиер и министер за животна средина кој денеска рече дека низ државата има повеќе од 200 000 дивоградби и оти институциите треба да постапуваат неселективно
Во вашиот случај, Меџити, се работи за криминал со перење пари и фалсификат со кои деца на 5 години граделе небезбедни згради на 12 спрата во Чаир – му порача скопската градоначалничка Данела Арсовска на министерот за животна средина Изет Меџити, по неговата изјава дека во земјава се регистрирани повеќе од 200 000 дивоградби и дека институциите треба да постапуваат неселективно во сите општини.
Арсовска на социјалните мрежи напиша дека од 200 000 барања за легализации во 80 општини во Македонија, во Чаир има 13 000 и оти криминалот, буквално, ќе им се „сруши врз глава“.
„Другите општини легализираат тераси, викендици, гаражи, поткровја градени до 2011 година, вие ГРАДИТЕ СЕГА, и со ФАЛСИФИКАТ на барањата на граѓани кои СТЕ ГИ ОДБИЛЕ за легализации на тераси, вашите другарчиња си легализираат 150 НЕБЕЗБЕДНИ ЗГРАДИ“,
напиша Арсовска.
Претходно денеска, вицепремиерот и министер за животна средина Изет Меџити изјави дека во 80 општини во земјава има 200 000 дивоградби и дека во општините со доминантно албанско население, предничи општина Гостивар. Тој исто така ги повика институциите да дејствуват секаде каде што има недозволено и незаконско градење.