Во видео објавено на социјалните мрежи, генералот Сигдел изјави дека армијата е посветена на зачувување на националното единство и територијалниот интегритет
Армијата на Непал најави дека од вечерава ја презема контролата, без да прецизира што конкретно значи тоа.
Во соопштението се обвинуваат демонстрантите кои ја користат моментната криза за уништување, грабежи и палење на јавни и приватни имоти.
„Ги повикуваме сите граѓани да ја поддржат армијата во овој напор“,
се наведува во соопштението на непалската армија.
Претходно, началникот на Генералштабот на армијата на Непал, генерал Ашок Раџ Сигдел, ги повика демонстрантите на дијалог за да се најде решение за политичка криза во земјата.
Во видео објавено на социјалните мрежи, генералот Сигдел изјави дека армијата е посветена на зачувување на националното единство и територијалниот интегритет.
Според него, протестите досега предизвикале голема штета и загуба на животи и ги повика демонстрантите на воздржаност.
„Наша колективна одговорност е да ги одржиме законот и редот, да обезбедиме национално единство и да спречиме понатамошни загуби на животи и имот“,
истакна Сигдел.
Протестите во Непал почнаа започнаа откако владата минатата недела забрани 26 платформи на социјалните медиуми, вклучувајќи ги Ватсап, Инстаграм и Фејсбук, поради тоа што не се регистрирале до крајниот рок.
Критичарите ја обвинија владата дека ја користи забраната за да ја задуши кампањата против корупцијата. Забраната беше укината синоќа, но протестите се интензивираа.
Демонстрантите бараат укинување на забраната за социјалните медиуми, што е веќе имплементирано и крај на коруптивните практики на владата.
Полицијата во Катманду употреби сила додека демонстрантите упаѓаа во зградата на парламентот и во домовите на неколку високи политичари и ги запалија.
Демонстрантите го запалија домот на премиерот на Непал, К.П. Шарма Оли, кој денеска поднесе оставка. Демонстрантите ги запалија и домовите на министерот за внатрешни работи Рамеш Лека, лидерот на Комунистичката партија на Непал, Пушпа Камал Дахал, како и приватно училиште во сопственост на министерката за надворешни работи Арзу Деуба Рана.
Досега во Непал загинаа 22 луѓе, од кои 19 се убиени синоќа.