Пресудата нема да стапи во сила до 14 октомври за да ѝ се даде време на администрацијата да побара од Врховниот суд да го разгледа случајот
Федералниот апелационен суд на Соединетите Американски Држави (САД) во Вашингтон пресуди дека повеќето од глобалните царини што ги воведе американски претседател Доналд Трамп се нелегални, пренесува Би-би-си.
Ова, според тамошните познавачи на состојбите, претставува потенцијална правна пресметка што може да ја преврти неговата надворешнополитичка агенда.
Пресудата влијае на реципрочните тарифи на Трамп, наметнати на повеќето земји низ целиот свет, како и на другите тарифи наметнати на Кина, Мексико и Канада.
За време на неговиот втор мандат, Трамп ги постави царините во центарот на американската надворешна политика, користејќи ги како инструмент за притисок во преговорите со трговските партнери.
Царините ѝ дадоа предност на неговата администрација во извлекувањето економски отстапки, но во исто време предизвикаа голема неизвесност на светските финансиски пазари.
Со одлука, Апелациониот суд на САД за Федералниот округ го отфрли аргументот на Трамп дека тарифите биле дозволени според Законот за вонредни економски овластувања, нарекувајќи ги неважечки како спротивни на законот. Пресудата не ги вклучува царините наметнати врз други законски основи, како што се оние за увоз на челик и алуминиум.
Пресудата нема да стапи во сила до 14 октомври за да ѝ се даде време на администрацијата да побара од Врховниот суд да го разгледа случајот.
Трамп ги оправда царините со Законот за меѓународни економски овластувања за вонредни состојби, тврдејќи дека деценискиот трговски дефицит претставува закана за производството и воената подготвеност на САД.
Во април тој прогласи национална вонредна состојба, велејќи дека вишокот увоз над извозот ги поткопува економските темели на земјата.
Така, во тужбите против царинските политики, Судот пресуди во корист на две групи тужители – пет мали американски компании и 12 држави предводени од демократите – кои тврдеа дека Законот не му дава право на претседателот да воведува царини.
Според нивниот став, Уставот дава овластување за воведување даноци и царини исклучиво на Конгресот, а секое делегирање на тие овластувања мора да биде јасно и ограничено.
На 28 мај американскиот Суд за меѓународна трговија во Њујорк пресуди дека Трамп ги пречекорил своите овластувања, додека друг суд во Вашингтон, исто така, заклучи дека Законот не одобрува воведување царини.
Двете пресуди беа обжалени од американската влада, а досега најмалку осум тужби ја оспорија царинската политика на Трамп, вклучително и една поднесена од Калифорнија.
Трамп на неговата социјална мрежа Трут соушл го критикуваше Апелациониот суд велејќи дека неговата одлука буквално ќе ги уништи Соединетите Американски Држави.
„Денес, еден високо партиски апелационен суд погрешно рече дека нашите царини треба да се отстранат, но тие знаат дека Соединетите Американски Држави на крајот ќе победат“,
рече тој.
Според него, доколку овие царини некогаш исчезнат, тоа би била целосна катастрофа за земјата, односно тоа би ги направило САД финансиски слаби.
Трамп го повика Врховниот суд да пресуди дека тој има овластување еднострано да воведува царини.
Во својата одлука, Апелациониот суд утврди дека само Конгресот, а не претседателот, има овластување да воведува царини, што покренува важно правно прашање за Врховниот суд во врска со обемот на овластувањата на претседателот.