Јавната обвинителка Фатиме Фетаи, објаснувајќи го предлогот за ефективен притвор, рече дека ставот на Вишото јавно обвинителство Скопје е дека во оваа фаза на постапката, имајќи ги предвид сите околности поврзани со кривичните дела кои му се ставаат на товар на осомничениот, мерката притвор единствено претставува доволна гаранција за обезбедување присуство на Нино Васев и успешно спроведување на кривичната постапка
Поранешниот директор на Онкологија, Нино Васев, пред судот рече дека бара чесно судење и да се брани од слобода
Во Апелацискиот суд во Скопје денеска се одржа јавна седница по жалбите на мерката куќен притвор за поранешниот директор на Клиниката за онкологија Нино Васев за случајот „Онкологија“.
Обвинителството побара укинување на куќниот и определување ефективен притвор, додека Васев побара од судот да се брани од слобода.
Судијката Весна Димишкова, образложувајќи го предметот, рече дека основниот суд одредил мерка куќен притвор во траење од 30 дена, ценејќи дека присуството на обвинетиот може да се обезбеди со мерка куќен притвор со оглед дека е пензионер на 64 години, имотен, татко на две деца и досега неосудуван.
Јавната обвинителка Фатиме Фетаи, објаснувајќи го предлогот за ефективен притвор, рече дека ставот на Вишото јавно обвинителство Скопје е дека во оваа фаза на постапката, имајќи ги предвид сите околности поврзани со кривичните дела кои му се ставаат на товар на осомничениот, мерката притвор единствено претставува доволна гаранција за обезбедување присуство на Нино Васев и успешно спроведување на кривичната постапка.
„Степенот на сомневање е на повисоко ниво, па и очекувањата на Обвинителството се осудителна пресуда за повеќе сериозни кривични дела кои му стојат како закана. Но, и интензитетот и времетраењето, како и сензитивот на конкретните дејствија“,
рече Фетаи.
Од овие причини, рече таа, смета дека жалбата на Обвинителството треба да се уважи и жалбата на одбраната да се отфрли како неоснована.
Поранешниот директор на Онкологија, Нино Васев, пред судот рече дека бара чесно судење и да се брани од слобода.
„Бараме чесно судење и укинување на мерката за обезбедување достапност. Сакаме да се браниме од слобода“,
рече Васев.
Неговиот бранител, адвокат Никола Ставрев, рече дека барале јавна седница, со цел и судот непосредно да се запознае со предметот што се води против осомничениот.
„Уште од самиот момент кога излезе аферата, осомничениот се даде во целосна соработка и истрагата што се води. Со таа цел присуствуваше и на анкетната комисија во Собрание и даде исказ за неоснованите обвиненија за кои се става на тапет. Активно учествуваше и во истражната постапка и даде два искази и одбраната самата обезбедуваше докази. Обвинетиот е запознаен со истрагата и истиот е цело време свесен за делата што му се ставаат на товар и да имал намера ќе се дадел во бегство“,
рече Ставрев.
Количината на доказен материјал што се става како отежнителната околност, според адвокатот на Васев, не може да биде основа за причина за определување мерка притвор, нагласувајќи дека нема доказна вредност и е собран од лица кои учествувале во изработката на економското вештачење од лицето Елизабета Дамевска, која во исто време со осомничениот била втор економски директор.
„Сметам дека е неоснован и незаконски предлогот на Обвинителството. Судот особено да го има вo предвид неговото досегашно однесување и статусот што го има“,
кажа тој.
Основното јавно обвинителство Скопје на 22 мај соопшти дека е завршена истрагата за предметот „Онкологија“ и до Основниот кривичен суд Скопје поднесе две обвиненија.
Првото обвинение, како што посочија тие, се однесува на економското работење на клиниката и опфаќа две лица. Првиот обвинет во својство на службено лице – медицински директор и вториот обвинет во својство на организациски директор на Клиниката, се обвинети за продолжени кривични дела – злоупотреба на службената положба и овластување, измама во службата и проневера во службата. Повеќето од дејствијата ги сториле во соизвршителство и во временски период од 2018 до 2022 година.
Второто обвинение се однесува на третманот на пациентите и опфаќа четворица лекари онколози. Првиот обвинет е исто така поранешниот директор на Клиниката, кој во соизвршителство со друга лекарка на истиот оддел се товари дека извршил продолжени тешки дела против здравјето на луѓето и несовесно лекување болни. Други двајца лекари се товарат за основното кривично дело несовесно лекување болни, и тоа сторено како продолжено дело, како повеќевременски поврзани дејствија што претставуваат повеќекратно остварување на исто дело.